Rojda Aydin 

 

ŞIRNEX - Cenazeya Taybet Înan yanî Dayîka Taybete qedexeyê tebervejîyayîşî de 7 rojî û 7 şewan kuçan de mende. Çend 6 serrî derbaz bi zî ne dîmenê cenazeya Taybete û ne zî tilîliyê ci yê xoverdayîşî ameyî xovîrrakerdiş. Kênaya ci Şaristan Alga, vat: "Dayîka mi xoverdayox bî, bi tililiyê xo hêz dayîne merdiman û bi tililiyê xo cewab dayîne dişmin."

 

Taybet Înan yanî Dayîka Taybete cenazeya ci 7 rojan kuçe de mend û no dîmen binê hişê ma de mend. Taybete, 2 tutê xo serra 1993 de netîceyê teqayîşê mayîne de vînî kerd. Silopiyê Şirnexî de demê qedexeyê tebervejîyayîşê kuçeyan de Taybet Înan hetê nîşangeran ra ameye birîndarkerdiş, bi saetan erd de birîndar mende û verê çimanê mêrde û tutanê xo de dinyaya xo bedilnayî. Sewbîna vistewreyê ci Yusuf Înan wazeno xo biresno cenaza hedef yeno girewtiş û yeno qetilkerdiş. Cenazeya Taybete 7 rojî û 7 şewî erd de mende. Dimayê 23 rojan cenaze ameye definkerdiş. Sewbîna nêverdayî ke kesêk tewrê merasîmê cenazeya ci bibo. Pêwa ke serê qetilkerdişê Dayîka Taybetera hende derbaz bi zî hema zî hetê huqûqî ra averşîyayîşêk dewa ser o çin o.

 

Vatişê tewr peyîn ya dayîka Taybete ya "Xeylêk cemidyena û têşan bîya" hema vîrê tutanê aye de yo. Kênaya aye Şaristan Alga (38) ajansê ma rê qal kerd.

 

7 tutî û gorêke!

 

Şaristane, dîyar kerd ke “No reya yewin nîyo" û wina qalê serebûtê serra 1993 de kiştişê Esmar a 12 serrî û Botano 9 serrî kena: "Serra 1993 de 7 tutî netîceyê teqînayîşî de merdî. Nînan ra 2 tutî, ê dayîka mi bî. Tutê bîn zî ê merdiman bî. Tutî vejîyabî teber semedo ke kay bikerê. O wext dayîka mi eşnawena û vînena ke tutê aye yê. Cenazeyê 7 tutan vera ke bêrê şitiş ameyî definkerdiş. O wext leşkeran îdia kerd ke 'PKKyî wina kerdo' La heme kesan zanayîne ke înan kerdo. Nê 7 tutan ma gorêk de defin kerdî. Semedê mayîne bedenê înan parçe parçe bibî. Semedê nê hemine gorêk de defin kerdî."

 

Kênaya ci bodrum de dinyaya xo bedilnayî 

 

Şaristane wina vat: “Dimayê 93ine de zî cuya dayîka mi zaf zehmet bî û bi zulmî dir rî bi rî mendî. Dima ra kênayêka dayîka mi bî û ma nameyê ci da Heznî (Sozdar). Aye dimayê ke pîl bî dî ke verê çiqas zulmêk pîl ma rê ameyo kerdiş. Sozdare zulm û zordarîya dewlete dî. Aye kênayêka zulm dewlete ra dîbî bî, aye zî tewrê refê azadîye bî. Dimayê çend serran ko de mende, demê qedexeyê vejîyayîşêteberî kuçeyan ê Cizîrî de ameye û uca de bodrum de dinyaya xo bedilnaye. Dayîke û waya mi demê qedexeyan de dinyaya xo bedilnaye."

 

'Ez cemidyena û xeylêk têşan bîya'

 

Şaristane dewam de wina vat: "Şer her ke şîne kûr bîne. Dayîka mi vat, tutanê xo tîya ra bigîrê û şêrê. Ma vat, dayê ti zî bê. Aye zî vat, ‘ma yê ke tîyayê heme tutê mi nîyê. Ez senîn înan vera bidî.' Dayika mi hemine sey tutanê xo dîne. Nêeşkayîne fek înan ra vera bido. Semedê nê ma vejîyayî, aye û pîyê mi uca de mendî. Verê ke bêro qetilkerdiş di hîrê rojî verê bi telefon ma gêra û vat, 'Her di tutê mi emanetê şima yê' sey ke wesiyetê xo kerd. La reyna zî kêyfê aye ca de bi. Dayika mi şîbî keyeyê cîrananê xo. O wext eşnawena ke adir kewto keyeyê aye û verê berê keyeyê xo de cîranê xo de veşnayîşê keyeyê xo ra ewnîyena. Dima ra vejêna ke şêro keye. Cîrana ma serê siba wurzena vînena ke dayîka mi birîndar a û kuçe de ya. Telefonê mi gin apiro û mi ra vatî 'Dayika to birîndar bîya.' Semedê dayîka xo ma ameyî Silopî. Ma waşt ke şêrê verê dayîka xo. Lêbelê dişminî destûr nêdayîne ke ma şêrê. Mabêne ma û dayika mi de 20 metre çinbi. La ma nêeşkayîne şêrê. Pîyê mi şî semedo ke xelas bikero la dayîka mi ci ra vat, ‘meye û do to zî bikişê.' Pîyê mi waşt ke la bierzo verê dayika mi û xelas bikero la reyna gule rijnayî, pîyê mi zî birîndar bi. Dayika mi tewr peyîn pîyê mi ra vat, 'ez cemidyena û ez xeylêk têşan bîya.' Waya mi zî alaya sipî berz kerd ke semedo ke şêro înan bîyaro labelê destûr nêdayîne. Sewbîna demo ke dedê mi zî vejîya teber şi semedo ke dayîka mi xelas bikero o zî bi hedefê guleyan û ame kiştiş."

 

'Waştişê ma tim û azadî û aştîye yo' 

 

Şaristane tewr peyîn wina qedêna: "Waştişê ma tim azadî û aştîye yo. Ma do tim destê xo semedê aştî derg bikerê. Waştişê ma oyo ke kesê cenazeya dayika Taybete 7 roj û 7 şewan teber de verdayî wa bêrê muhakemekerdiş û cezakerdiş. Heta kerdoxê dayika mi nêrê cezakerdiş ma do nêvinderê."