Sîdra Mamo

 

ŞEHBA - Cinîyê Efrînî yê ke Wargehê Berxwedanî yê Kantonê Şehbayî de ciwîyenê, derheqê daranê zeytûnan ke hetê komê girêdayê dewleta tirkî ra yenê birnayîş, qisey kerdî. Cinîyan bale ant serê talankerdişê xozaya Efrînî û wina vatî: "Dewleta tirkî ya dagirker Efrîn de darê zeytûnan birnena û xoza talan kena."

 

Dimayê ke 18ê Adara 2018  de dewleta tirkî û komê girêdayî ci Kantonê Efrîn û dewanê ci temamî kerd binê kontrolê xo talanê xoza û û binpêkerdişê heqan dest pêkerd.  Darê zeytûnan kok ra birnenê û benê Tirkîya. Sewbîna bi dewletê Ewropayî dir serê zeytûn û rûnê zeytûnan de bazirganî kenê. Her serre dewleta tirkî û komê girêdayê ci dest danê serê zeytûnan û nêverdenê welatijê Efrînî derbazê mîyanê erdanê xo bibê. Goreyê belgekerdişê Rêxistinê Heqê Merdiman ê Efrînî serra 2021 de zêdeyêr 16 hezar û 5 sed darê zeytûnî Efrînî de ameyî birnayîş. 5 hezar darê zeytûnî veşnayê. Heto bîn ra dest dayê serê 11 hezar darê zeytûne. Tewr peyîn dewleta tirkî 10ê Kanûne de dewa Meydankî ya qezaya Şerayî ya Efrînî de nêzdîyê 50 darê zeytûnî birnayê. Derheqê na babete de cinîyê koçberî yê Efrînî yê Wargehê Berxwedanî de manenê, ajansa ma rê qisey kerdî û helwestê xo hemverê kerdişê dewlata tirkî de ramojnayî.

 

'Xozaya Efrînî yena talankerdiş' 

 

Firyal Osman, dayîka 4 tutan ke qezaya Mabetayî ya girêdayê Efrînî de derheqê birnayîşê daran de wina vat: "Bi 4 serrî yo ma Efrîn ra koçberê Kantonê Şehbayî bîyê. Ma Wargehê Berxwedanê yê qezaya Fafînî yê Şehbayî de ciwîyenê. Ma vera top û tanqê dewleta tirkî ya dagirker û çeteyê ci de mecbûr mendî ke verê xo bidê tîya, semedo ke ma tutanê xo bipawê. Ma sivîl ê, ma çi sucê ma bi dewleta dagirker bi heme wehşetê xo hêrişî ma kerd? Dewleta tirkî ya dagirker û çeteyê ci bi 4 serrî yo Efrînê ma dagir kerdê.  Mal û milkê ma diznenê. Daranê ma yê kok ra wedarnenê û benê Tirkîya. Dewleta dagirkere heme cayê zeytûnanê ma talan kena û nêverdana ke ma şêrê mîyanê erdê xo. Ma çi sucê xoza û keyeyê ma esto ke xirab kena?"

 

'Heqê ma esto ke ma bi asayîş welatê xo de biciwîyê' 

 

Hesna Mihemed ke dewa Kurzêlî ya qezaya Şêrewaya Efrînî ya derheqê eynî babete de qisey kerd û vat: "Semedê hêrişê dewleta tirkî ya dagirker ma mecbûr mendî verê xo bidê Kantona Şehbayî. Bi 4 serrî yo ma Wargehê Berxwedanî de ciwîyenê. Cuya kampe xeylêk zehmet a. Dewleta tirka dagirkere dimayê ke 18ê Adara 2018 de ma Efrîn ra koçber kerdî, mal û milkê ma diznayî. Darê ma yê zeytûnan birnenê û benê Tirkîya ramnenê. Xozaya ma talan kenê. Ma tîya zaf xemgîn benê. Ma sey her şarî heqê xo yê meşrû wazenê. Heqê ma yo ma bi asayîş welatê xo de biciwîyê. Ma do heta sanîyeyê peynî xo ver bidê. Ma do serê rêça pakrewananê xo de şêrê û ma tu wext fek rayîrê înan ra vera nêdanê, heta ke ma agêrê warê zeytûnan." 

 

'Dewleta dagirkere merdimayî nas nêkena'

 

Rengîn Birîmo ke qezaya Bilblê ya girêdayê Kantonê Efrînî de ya bale ant serê birnayîşê darê zeytûnan û wina vat: "Ma semedê hêrişê dewleta tirkî ya dagirkere û çeteyê ci koçberî Şehbayî bî. Şarê Efrînî zaf xoza ra girêdayeyê. Coka talan kena. Her roje Efrîn de dewleta dagirkere û çeteyê ci darê zeytûnan birnena û xoza talan kenê. Dewleta tirkî ya dagirkere qanûnan û merdimayî nas nêkena. Kerdox û desteştişê ke dewleta faşîst Efrîn de kena hemverê temamê qanûnê merdimayî yê. Efrîn de tewr zêde hêrişî serê cinîyan de yeno kerdiş. Cinî her roje yenê remnayîş û yenê tecawuzkerdiş. La wa nê baş bizanê ke ma do Efrîn bixelisnê."