MERKEZÊ XEBERAN - ÎHDyê 30 bajarî, semedo ke bale bianco serê rewşa kesê ke zîndanan de dinyaya xo bedilnenê û heqê weşîya tepişteyê nêweşan, bi sloganê 'Ma cuye pawenê' qerarê na nobete bidê destpêkerdiş dabî. Na çarçewa de nobeta "Ma cuye pawenê" Anqara û Amed de ame destpêkerdiş.

 

Komeleya Heqê Merdiman (ÎHD) semedo ke bale bianco serê mergê bi guman û problemê tepişteyê nêweşan ê wareyê bidestkerdişê heqê xo yê weşîye de ewro 30 bajarê ke şube û temsîlkarîyê ci estê nobeta "Ma cuye pawenê" bidê destpêkerdiş. Nobeta ke keye, pawitoxê heqê merdiman û avûkatî zî beşdar benê ame destpêkerdiş.

 

Anqara

 

Nobete Anqara de şubeyê ÎHDyî de ameye destpêkerdiş. Salona ke eşkerayî ame dayîş, pankartê "Ma cuye pawenê, wa tepişteyê nêweşî serbest bêrê veradayîş" ame daliqnayîş, nobete bi beşdarbîyayîşê Hemserekê Pêroyî yê ÎHDyî Ozturk Turkdogan û Parlamenterê Partîya Demokratîke ya Şaran (HDP) yê Kocaeliyî Omer Faruk Gergerlîoglu dest pêkerd. Nobeta ke ameye destpêkerdiş de fotografê Garîbe Gezer, Vedat Erkmen û fotografê tepişteyê nêweşan ameyî ronayîş.

 

'Gelo tepişteyê sîyasî bi Covîd-19 nêkewenê?'

 

Ozturk Turkdogan dîyar kerd ke înan ewro heme şubeyê ÎHDyî de çalakiya "Ma cuye pawenê" semedê tepişteyê nêweşan dayê destpêkerdiş û dewam kerd, “Sîstemê daliqnayîşê Tirkîya rast nêbi. Bi operasyonê 19ê Kanûne dir sîstemê înfazî bi. Bi xoverdayîşê tepişteyan, no sîstem ame şikinayîş. Labelê eynî sîstem dewam keno. Îmraliyî de awankerdişê zîndanê bi asayîşê berzî dest pêkerd. Nê sey tabûtî ameyî viraştiş. Demê pandemî de, serekê çeteyan ameyî veradayîş. La tepişteyê sîyasî nêameyî veradayîş. Aysel Tûglûk nika zîndan de ya. Ma wazenê ke bale biancênê ser. Prosesê Covid-19 de cîyayî esto. Ma tepişteyê sîyasî bi Covid nêkewenê gelo? No çi cîyayî yo? Demo ke ma zîndanan rê mektubêke viraşt, ma Halîl Guneşî rê zî nusayîne. La nika mîyanê ma de nîyo. Tepişteyê sîyasî û nêweşî bi mehnayê ke nînê qebulkerdiş, nînê veradayîş. Yê ke nêeşkenê zîndan de bimanê, sucê înan çi beno wa bibo gerek bêrê veradayîş."

 

'Merg netîceyê îradeyê kesê ke binpaykerdişan qebul nêkeno yo' 

 

Dima ra Parlamenterê HDPyî yê Kocaeliyî Omer Faruk Gergerlîoglû qisey kerd û vat: Zîndanan de merdimî mirenê, nêheqî înan rê yeno kerdiş, la heme komel nê nêkeno rojevaya xo ya sereyîn. Beşêk çapemenî nê keno rojeva xo ya sereyîn. Komel serê kesê ke serê wijdanê xo de ver bi întîxarî rê yenê ramnayîş çi fikiryeno? Kesê ke zîndanan de cuya xo demê peyîn de vînî kerdî, destpêk ê. Na hîkaye newe nîya.

 

Tewr peyîn Ozturk Turkdogan dîyar kerd ke ê sey Şubeyê ÎHDyê Anqara saete mabêne 10.00-21.00'an de nobete bigîrê û vat, ê her tewir tewrbîyayîş û serdayîşan rê akerde yê.

 

Amed

 

Şubeyê ÎHDyê Amedî zî çalakiya nobete dest pêkerd. Parlamenterê HDPyî Dêrsim Dag û Pero Dundar, hemserekê HDPyî yê Amedî Gulîstan Atasoy û Zeyyat Ceylan, xizmê tepişteyê Baroyê Amedî dest bi “Nobeta Edaletî” kerdî û xeylêk pawitoxê heqê merdiman û temsîlkarê sazgehê sivîl yê komelî zî paştdayîş dayî nobete.

 

Salona ke çalakî ameye kerdene pankartê "Ma cuye pawenê! Tepişteyê nêweşan rê azadî" ame daliqnayîş û fotografê Garîbe Gezer, Halîl Guneş, Celal Şeker, Abdûrrezzak Suyur, Mehmet Alî Çelebî û Vedat Erkmen yê zîndanan de dinyaya xo bedilnayî.

 

Derheqê babete de Hemserekê Komîsyonê Zîndanan ê Merkezî yê  ÎHDyî Ercan Yilmaz eşkerayî da û waşt ke tepişteyê nêweşî yê zîndanan bêrê veradayîş.