WAN - Hemsereka HDPyî ya Wanî Handan Karakoyun bale ant serê binpaykerdişê heqan ê zîndanan û vat: “Tîya ra tepya çi lazim keno ganî bêro kerdiş û no zî lezabez tepişteyê nêweşî bêrê veradayîş."

 

Bi taybetî prosesê peyîn de zîndanan de hemverê tepişteyan tecrîd, îşkence û binpaykerdişê heqan yeno kerdiş û tepişteyê nêweşî yew bi yew dinyaya xo bedilnenê. No rastîyê sîstemê zîndanan ramojneno. Merdişê ewil ê zîndanan ciwano bi nameyê Bangîn Muhammedo 33 serre ke Kurdê Rojawanî ra bi. 12ê teşrîna peyêne de Bangînî dinyaya xo bedilna la rayaumumî encax 26ê teşrîna peyêne de xeberdar bî. Garîbe Gezer zî 9ê Kanûne de Zîndanê Tîpê F yê Hûmara Yew ê Kandirayî de hucre de biguman dinyaya xo bedilna. 15ê Kanûne de zî Abdulrezak Suyur û Halîl Guneş yê nêweşî dinyaya xo bedilnayî. Rojêke dimayê nê tepişteyo bi namêyê Salîh Tugrul dinyaya xo bedilna. Salîhî 2013 de zîndan de felç derbas kerdibi û 2014 de amebi veradayîş. Salîh ke nê 7 serran de rewşa ey zaf giran bî, 16ê Kanûna de dinyaya xo bedilna.

 

Reyna 17ê Kanûne de bi nameyê Îlyas Demîr cezaya muebetê giran ci rê amebi birnayîş û Zîndanê Tîpê T yê Boluyî tepişte bi dinyaya xo bedilna. 19ê Kanûne de zî Vedat Çem Erkmen bi bahaneyê ‘asayîşê ganê ey çin o' qawuşe ra ame vetiş û hucreyê ke mendêne de bi guman dinyaya xo bedilna. Eynî roje de tepişteyo bi nameyê Yasîn Eneç zî zîndan de bi îşkenceyê giran ame birîndarkerdiş.

 

Hemverê caardişê tepişteyê nêweşan û astengkerdişê  heqê dermankerdişî teber de zî çalakî, bername û reaksîyonî dewam kenê.

 

'Dermananê înan zî nêdanê'

 

Hemsereka HDPyî Wanî Handan Karakoyun bale ant serê binpaykerdişê heqan ê zîndanan û vat: "Tepişteyê ke hewteyêk de dinyaya xo bedilnayê, semedo ke dermankerdişê înan nîno kerdiş, mirenê. Tepişteyê nêweşna nêbenê nêweşxaneyan. Şertê zîndanî û prosesê pandemî de zîndanan de binpaykerdişê heqan ê giran ameyî ciwîyayîş. Heme kesê wayîrê wijdanî ganî refleksêk cidî ramojnê."

 

'Ganî tepişteyê nêweşî bêrê tehlîyekerdiş'

 

Handane dewam de wina vat: "Hewteyêk verê Garîbe Gezer dinyaya xo bedilnaye û verê nê bi mektuban û hemkariya keye û avûkatanê xo zilm û îşkenceyê ke dîbî neql kerd. Garîbe hucreyê xo de merde ameye vînayîş. Ez wazena vajî ke no cînayet o. Pêwa hende vengdayîş kerd la selahîyetdaran çîyêk nêkerd. No zî tabloyê giran vejeno werte. Ganî tepişteyê nêweşî ca de serbest bêrê veradayîş. Ewro ra tepîya semedê wezaretê têkildarî ra vengdayîşêk ma çin o. Ê nê prosesî nêvînenê."

 

'Ma bi desan rey muracat kerd'

 

Hemsereka Komeleya Paştdayîşê Keyeyê Tepişteyan ê Wanî (TUHAY-DER) Kudret Temel zî wina vat: “Tepişteyê ke dinyaya xo bedilnayî nêweş bî. Dermankerdişê înan nêameyîne kerdiş. Emsar semedê tepişteyê nêweşî bêrê veradayîş ma des rey muracat kerd. Semedê pandemî nêeşkayîne xo ra biewnê. Pêwa ke ma vat nînê dermankerdiş û ganî bêrê veradayîş, çîyêk nêame kerdiş."

 

'Wezaret çira bêveng o?' 

 

Kudrete tewr peyîn wina vat: "Hende kesî dinyaya xo ebdilnenê, wezaretê dade se keno, wezîfeyê ci çi yo, çira bêveng o? Zîndanan de tepişteyê nêweşî yê giranî estê. Dermankerdişê înan nîno kerdiş. Dermanê înan nîno dayîş. Wa bêrê veradayîş, keyeyî înan derman bikerê. Ganî heme tepişteyê nêweşî bêrê veradayîş."