Melîke Aydin 

 

ÎZMÎR - Onur Gencer ke Denîz Poyraze qetil kerd, do rojê ameyin de vejîyo hemverê dadger e. Dadîya Denîze, Fehîme Poyraz vengdayîş kerd ke vat, ê heme kesî roja roniştişî de verê edlîye de pabeyê û vat ê edalet şarî rê verdenê. 

 

17ê Hezîrane de mêrdeyo bi nameyê Onur Gencer, hemverê HDPyê Îzmîrî hêriş kerd û xebatkara partîye Denîz Poyraze qetil kerd. Dimayê nê, reaksîyonî pîl bî. La çapemenîya hetgêre, Kurdî û HDPyî hedef mojna ra û serebûtî nêwaştî bivînê. Dimayê qetilkerdişî cigêrayîşê cayê serebûtî zî bi îdîanameyo ke ameyo hadrekerdiş, hewl ame dayîş ke serê qetlîamî bigîrê. 

 

Dimayê qetilkerdişî, îdîanameyo ameyo hadrekerdene, ameyo qebûlkerdiş û gumanbar Onur Gencer do 29ê Çeleyî de vejîyo hemverê dadger e.

Vernîyê roniştişî de dadîya Denîze, Fehîme ajansê ma rê qal kerd. 

 

‘Kesêka polîtîk bî’

 

Fehîmeye vat ke Denîze kesêka sosyal e û gonîgerme bî û wina vat: "Wexto ke mêrdeyê mi tepişte bi, Denîze emro qij de, way û birayanê xo rê ewnîyayêne. O wext ez zî xebetîyayêne. Denîze tutîtîya xo nêcuya. Cuya aye wina dewam kerd. Babê aye zîndan ra vejîya. Denîze kesêka polîtîk bî. Çi kerdêne bi sereyê xo kerdêne. Cîranan ra hes kerdêne. Embazîya aye weş bî. Zaf hêsgire bî. Kesêk nêşikinayêne."

 

‘Denîze her çîyê mi bî’ 

 

Fehîme dîyar kerd ke Denîze tutan dir sey embaze bî û wina dewam kerd: "Tu rey teda nêkerdêne. Xeyalê aye bî. La leze şî. Dimayê şîyayîşê Denîze, ez xo weş hîs nêkena. Ez nêmojinena tutanê xo. Ez kena zerrîya xo. Cayê aye zaf aseno. Wexto keye de bîyêne, areyî aye hadre kerdêne, werd viraştêne. Denîze her çîyê mi bî. Dest û lingê mi bî. Dima ra Denîze ameye qetilkerdiş, ez bi dermanan serê linganê xo de menda. Ma nêbîyêne ê nêeşkayêne qebûl bikerê. Aye rojêke zerrîya ma nêşikna. Denîze kesêka başe bî, bêpawitiş bî, aye no îşkence heq nêkerd." 

 

‘Îşkence Denîze rê kerdbi’

 

Fehîme dewam de wina vat: "Verguman seba polîsan derbasê partîye beno û roja qetilkerdişî bi çenteyêke keweno zereyê partîye. Polîsî vînenê. Qatil 35 deqeyî cor de maneno. Dima ra gulan rijneno berayan. Bedenê bêganî yê Denîze îşkence keno. Verguman seba xeylê kesî bikişo keweno bîna. La kesî nêvîneno û hêrsê xo Denîze ra vejeno. Dima ke Denîze ameye qetilkerdiş, merdiman paştî da mi. O gule tenî nêginayo kênaya mi ro, gina şaran ro. Kezeba mi sotina. Akin Birdalî vilikî ardî û ame serê mezelê Denîze. HDPyî ra kesî ameyî. Ez keyfweş bîya, hêsgir bîya. Keyeyê ma veng nêmaneno. Hîsêk weş o."

 

Nameyê aye dayî 27 dergûşan’

 

Fehîme dîyar kerd demo ke Denîz ameya qetilkerdiş nameyê aye dayê 27 dergûşan û keyeyî nika fotografê dergûşan înan rê şawenê û vat, Denîze şî la xeylêk Denîzî ameyê dinya.

 

‘Gumanbar nêweş nîyo’ 

 

Fehîme dîqet ant serê gumanbarî û vat aye wazena ke gumanbar cezaya giran bigîro û wina vat: “Gumanbar nêweş nîyo, eke nêweş bîne nêeşkayîne şêro perwerde bigîro. Şîyo Sûrîye, yê ke înan rê rayîr dayê estê. 23 rey qereqole gêrayo. Paştdayîş dayê. Ma wazenê her çî vajê. Do 40 kesî qetil bikerdêne. Wa heme çî vajo. Ma veng danê avûkat û şarî ke wa paştdayîş bidê ma. Ma edalet şarê xo rê verdenê.”