Bêrîvan Nalîn 

 

KOBANÎ - Hemsereka PYDyî ya qezaya Şêranî, Fatma Osman derheqê tehdîd û kerdişanê dewleta Tirkî yê serê herêmanê Vakur û Rojhelatê Sûrîyeyî de wina ard ziwan: "Kerdiş û tehdîdê dewleta Tirkî û çeteyê aye yê serê herêmanê Vakur û Rojhelatê Sûrîyeyî de bêmabên domnenê, neticeyê nê tehdîdan de bi seyan hemwelatîyê herême dinyaya xo bedilnayî û hetê ekonomîye de zî zaf zîyan virazîyawo. Sewbîna bi tesdîqkerdişê dewletan şer yeno kerdiş. 

 

Dimayê dagirkerdişê Girê Spî û Serêkanî, dewleta Tirkî û komê girêdayîyê aye bêmabên hêrişê qezaya Eyn Îsayî kerd. Dewleta Tirkî bi tehdîd û hêrişanê xo şarê qezayî qetlîamî dir derbas kerd, tewr zafêr cinîyan û tutan mîyanê şerî de zirar dî û dinyaya xo bedilnayî. Dewleta Tirkî bi no hawayî sînordar nêmend, goreyê çimeyê herême sîlehê qedexekerdeyî şuxulnayê. Qeza bi tanq, obîs, hawan ûsb. bombevaran kerd. Kampa Tîl Semenî yew kampêka koçberê Girê Spî ya, dewleta Tirkî hemwelatîyê Girê Spîyî bi zor da koçberkerdiş û nika zî înan bombevaran kena. Nê hêrişan dir wazeno tersêke bikero mîyanê şarê herême û koçberbîyayîşêk bîn bido destpêkerdiş. Goya hêzê Rusyayî hêzêk garantor o, labelê pêwa hêriş û gefê serê herême Rusya bê veng a, na zî hemkarîya înan eşkera kena. Mal û milkê welatijan ameyê diznayîş û talankerdiş, tutî wendiş ra bêpar mendî, tutî dadî û babî ra sewkurî mendî. Bi seyan tutî verekê dadîyanê xo de ameyî qetilkerdiş. Eynî wext de tutî bi şero psikolojîk reyde rî bi rî manenê. Mîyanê serrêke de rayîrê M4, dewa Seyda, Dibis, weringêra Seqir, kampa Eyn Îsa ûsb. hêrişan dir rî bi rî mendê. 

 

Derheqê serebûtî de Hemsereka Partîya Yewîyîya Demokratîke ( PYD)ya qezayê Şêranî Fatma Osman ajansê ma rê qisey kerd. 

 

‘Bi tesdîqkerdişê dewletan dir şer yeno kerdiş’

 

Fatma, destkerdişê qiseyê xo de ard ziwan ke dewleta tirkî û komê girêdayê aye bi tesdîqkerdişê dewletanê mîyanneteweyî dir şerê ma kenê û wina vat: "Dewletê mîyanneteweyî duştê hacetê Rayberîya Xoserîya Demokratîke şer kenê û wazenê bandurîya xo nê herêman de zî bikerê. Herêma Vakur û Rojhelatê Sûrîyeyî de her milet bi ziwan, kultur, ale û estbîyayîşê xo cuyeno. Şarê herême serê yew amance û waştene de têkoşîn kenê, azadîye, seyewbînîye, demokrasî û edalet wazenê. Eke nê pêro bêrê ca, do sîstemê îqtîdaran zî mexlûb şêro û do sîstemê ma serbikewo. No reya yewin nîyo û ne zî serra yewin a, tarîxê Osmanîyan de her kes zaneno ke çi ci de esto û o tarixî de çi ameyo kerdiş. Bi nê tehdîdan tarîxê Osmanî agêyrenê. Neyarê Kurdan ê bi serran ê. Çiqas ke Kurdan sere wedarnayo, neyarî ê qetil kerdê, seba nê zî Kurdî heta roja ewro zî sereyê xo hemverê dîktatoran de vileçewtî nêkerdo. Bi şerê eskerî û bi şerê xusûsî, dewleta Tirkî hewl dana rijnayîşêk mîyanê komelî de bido awankerdiş. Xeynî şerê eskerî, bi teyaranê bêmerdim qetlîam ardî ca, netîce de sivîlî bîyî hedef." 

 

‘Dewleta Tirkî Rayberîya Xoserî tehdîd kena’

 

Fatma, peynîya qiseykerdişê xo de qetî kerd ke, zereyê Tirkîya yeno rijnayîşî û peynî kerd: "Êdî heme dinya zanena ke dewleta Tirkî serantişê çeteyan kena, sere de bi nameyê cîyayî hêriş kerdêne, la no peynî de êdî rîyê dewleta Tirkî ame eşkerakerdene ke bi destê aye no şer yeno kerdiş. Dewleta Tirkî terora çeteyan DAÎŞî perwerde kena û bi nameyê terorî hêrişê herême kena. Dewleta Tirkî çiqas hewl dana ke qet fersend vernîya welatijê herême de nêverdo ke şar beranberê hacetê estbîyayîşî reaksîyonê xo bido ramojnayîş. Sewbîna Rayberîya Xoserî tehdîd kena. Bi nê hewldayîşê xo heme metodê ke nînê qebûlkerdene xebitnena. Hetê têmîyanîye de mîyanê pêkerdişê miletan de dana awankerdiş, heme wextî de wazena ajantî serê şarî de ferz bikero û madeyo tiryakî mîyanê şarî de vila bikero. Nameyê Kobanî dinya de veng dayo, seba nê zî bi rikê şerê xusûsî, nê nameyî wazenê bidê xirabkerdiş. Birnayîşê awa Çemê Firatî zî rêze de nîya, nizdîyê serrêka awe amîya birnayîş, no yew zî verdeno ke şar vera Rayberîya Xoserî aciz bibo. Tirkîya bi xo mîyanê xo de zor de ya û zormendişê xo herême de vila kena. Vengdayîşê mi temamê şarê Kurdî rê esto ke her çar perçeyê Kurdistanî ma êdî yewîyîya xo awan bikerê."