Oznur Deger

 

ESKÎŞEHÎR - Avûkate Heval Yildiz Karasû ke bi sîlehan serê buroyê aye yê huqûqî de ameyo grewtiş, diyar kerd ke nê welatî de Suleyman Soylu bi vatişanê nîjadperestîye ke keno, merdiman teşwîqê hêrişan keno û wina vat: "Hinî nêşenê cuwîyayîşê hinîyan form bikerê. Vatî, huqûq weyî kenê. Bêcezamendiş zî cesaret dano vergumanan. Ganî duştê hêrişan de her kes şarî reyde ca bigîro." 

 

Welat de vatişê nefretî û nêseyyewbînîye yê îqtîdarê sîyasî dir verê hêrişanê nîjadperestan akeno û menga hamnanî de, hemverê Kurdan û multecîyan hêrişê nijadperestan caameyê. Sewbîna hemverê HDPyê Îzmîrî zî hêriş kerd û Denîz Poyraze ameye qetilkerdiş. Şaristanê Konyayî qezaya Meramî de hemverê keyeyê Kurd ê Dedeogullari qetliam ame ca û 7 kesî ameyî qetilkerdiş. 

 

‘Vergumanî nêameyî destbendkerdiş’

 

Yew kesêk hêrişanê nîjadperestî dir amebi, rî bi rî zî  avûkate dewaya Qetlîamî ya Garê Anqarayî û Xoverdayîşê Gezîyî, Ali Îsmaîl Korkmaz, Ûgûr Kaymaz, Şerzan Kûrt, avûkate înan Heval Yildiz Karasû bî. Buroyê avûkate Hevale qezaya Odûnpazari ya Eskîşehîrî de bî 25ê Êlûla 2018ine de komêk faşistî bi sîlehan ser o girewt bî. Cipersayîşo ke ame destpêkerdiş de verguman; Ahmet Yalim, Fûrkan Kaya, Emre Yaş,  Ahmet Yuksel, Emîn dogramacioglu, Onûr Demîrîş û Omer Bûlût ganî bêtepiştiş ameyî muhakemekerdiş. 20ê Çeleyî de 6ine Dadgeha Cezaya Aslîye ya Eskîşehîrî de roniştişê qerare ya dewa ame vînayîş. Derheqê vergumanê ke sûcê bînîn ra nika tepişteyê de 'zirar dano mal', 'delîlê sûcî vinîkerdî', 'sîleho bê ruhsat serê xo de çarnayîş', 'bi sîleh tehdîd', 3 serrî û 4 mengî û 15 rojî û 8 serrî û 4 mengî û 15 rojî ceza ameye dayîş. 

 

Avûkate Yildiz Karasû derheqê hêrişanê nîjadperestan de erjnayîş kerd. 

 

Hevale da zanayene ke, a dewanê cinîyan ewnena û avûkatîya heqê merdiman kena û seba nê hedef ameya girewtiş û buroya aye zî Odûnpazarî ke cayêk kar û barê çetebîyayîşî yê îlegal ci de yeno kerdiş, ca gêno û wina vat: "Ez Temûza 2018ine de şîya buroyî, menga Êlûle de mi tabela aliqna. O wext de weçînayîş bîbî û namzetê AKPîyî Volkan Dogan bi. Çeteyo ke mi behs kerd, Volkan Dogan ey dir hemkarîye de bî. O wext şaredara qezaya Odûnpazarîyî CHP bî. Mabênê înan de reqabet bi. O wext têkoşînê heqî xeylêk zêde bî. Ma zî sey partîya EMEPî xebate kerdêne." 

 

‘Sîstemêko mafyayî’

 

Hevale vat koma çeteyan uca hegemonyaya xo awan kerd bî û sîstemêke mafyayî ke welatîyê Odûnpazarî ra xerac girewtêne bî. Hevale wina dewam kerd: "Reyêk de nameyê avûkatêke Heval dî û ci dir empatî nêkerdî. Verê ke mi dir qisey bikerê û munaqeşe bikerê hêriş kerdî. Kafeya Osmanî de ameyê têhet û vatê ke ma do bîyarê vîrê aye, aye kam a. Keyeyê cîrane mi gulevaran kerdbî la baş bî ke, aye keye de nêbî." 

 

‘Ez hîrê serrî binê verestîya sîlehan de şîya û ameya’

 

Hevale eşkera kerd ke dimayê hêrişî înan waşto ke aye buroyê xo ra vejîyo û aye tersnayê û wina vat: "Dimayê hêrişî ma beyanatêke rêxistina girseyî demokratîke rê da. Ma mesaj 'no papûr, meydanê ma yo. Ma eşkenê her ca de buroyê xo akerê û karê xo bikerê.' da. Ez hîrê serrî binê verestîya sîlehan de şîya buro. Prosesê hîrê serranê dewa de vergumanêk zî nêame destbendkerdiş. Emnîyete eşkayêne vernîyê hêrişî bigîro. Vernîya hêrişî vatişê sey 'Hevale do no der de bi rehetî avûkatî bikero, şima zî tîya do vinderê?' ame goşê mi. Ê ke nê înan ra vatê verpersîyarê serebûte yê. Roniştişî de verê çimanê polîsan de, ma tehdîd kerdî. Hêrişê min û embazê mi kerdî. Ma hereketê polîsan uca de vîna."

 

Hevale bale ant serê karê û barê ke çeteyî kenê û dîyar kerd ke nê çeteyî kewenê kar û barê çek-senetî û vat, dimayê kesêk nêzdîyê îdarekarîyê dewlete keweno, a dosya ra nê çeteyî yenê tepiştiş.

 

‘Huqûq û sîyaset yewbînan wey kenê’ 

 

Hevale qiseykerdişê xo wina qedêna: “Demê peyîn de hêrişê nîjadperestî zêde bîyê. Polîtîkayê bêcezabîyayîşî û vatişê teşwîqkerdişî mîyanê yewbînan de yê. Yewbînan wey kenê. Vatişê Wezîrê Karê Zereyî nê komê çeteyan kenê tevger. Wezîrê Karê Zereyî Suleyman Soylu bi vatişanê xo dir rayîrê nê hêrişan akeno û cesaret dano gumanbaran. Wezîfeyê ke keweno serê milê ma ganî ma pîya hemverê nê hêrişan de vinderê.”