Rojda Aydin 

 

ŞIRNEX - 4ê Çeleyê 2016 de Silopî de demê qedexeyê tebervejîyayîşê kuçeyan de 3 cinîyê siyasetmedarî ameyî qetilkerdiş û pêwa ke 6 serrî derbaz bi zî hema hetê huqûqî ra dosya ser averşîyayîşêk çin o. Avûkatanê dosya ra Gulşen Ozbek, ard ziwan ke tehqîqatêk baş nêameyo kerdiş û vat: "Serra 2018ine de qerarê nimitişî ame dayîş û no qerar hema zî dewam keno. Semedê nê zî ma bi endîşeyê ke demê dosyaye peynî bibo.”

 

Qedexeyê tebervejîyayîşê kuçeyan ke hetê Walîtiyê Şirnexî ra 14ê Kanûna 2015 de amebi îlankerdiş merkezê qezaya Silopî de 37 rojan dewam kerd. 4ê Çeleyê 2016 de 3 siyasetmedarê cinî yê kurdî Endama Meclîsê Partiya Herêman ê Demokratîke (DBP) Sêvê Demîr, aktivîsta Kongereya Cinîyan ê Azadan (KJA) Fatma Uyar û Hemsereka Meclîsê Şarî yê Sîlopî Pakîze Nayir, taxa Yeşîlyurdî de netîceyê gulevaranê wesayîtê zirxî de dinyaya xo bedilnayî. Serê serebûtî ra 5 serrî derbaz bî zî hema hetê huqûqî de tu averşîyayîşêk çin o.

 

Avûkatanê dosya ra Gulşen Ozbek, derheqê aqûbetê dosya de ajansê ma rê qisey kerd.

 

‘2018 de qerarê nimitişî ame dayîş’

 

Gulşene, ard vîr ke serê qetilkerdişê Sêvê Demîr, Pakîze Nayir û Fatma Ûyar 6 serrî derbaz bîyo û dîyar kerd ke dosyaya cipersayîşî de hema tu averşîyayîşêk çin o. Gulşene wina vat: "Dosyaya cipersayîşî ke serra  2016 de ameye destpêkerdiş de wexto ke ma waştişnameyê xo yê dosyaya cipersayîşî newe kerd û pêşkeş kerd, serra 2018 de qerarê nimitişî ame dayîş. Dosyaya cipersayîşî de qerarê nimitişî hema zî dewam keno.”

 

‘Dimayê di serran qerarê nimitişî ame dayîş’ 

 

Gulşene vat: "Huqûq de no çî çin o. La cewab nêdayî îtîrazê ma. 2 serrê ewil de vernîya qerarê nimitişî bêro dayîş, tu game nêameyî eştiş û tu çî nêame kerdiş. Derheqê serebûtê qetilkerdişê Sêvê Demîr de zî îfadeyê tu kesêk zî nêame girewtiş û dîmen zî nêkerdî mîyanê dosya. Dewam de ez wazena vajî ke ma nêzanê unsûr bica ameyê yan ney, semedo ke dosya de qerarê nimitişî esto."

 

‘Delîlê ke lazimê nêkerdî mîyanê dosya’

 

Gulşene vat, wina aseno dosya bi hawayêke şefaf û huqûqî nîna kerdiş û vat: "Seba cipersayîşêk dadwer ganî destûr bêro dayîş ke merdimê mexdûran xo biresnê dosya û waştişê înan bi ca bêrê. Semedê roşnkerdişê serebûtî zî waştişê ke dosya rê ameyê şawitiş zî nêameyî bicakerdiş. Semedê nê zî ma bi endîşeyê ke demê dosya peynî bibo."

 

‘Îfadeyê tu kesêk nêame girewtiş’

 

Gulşene tewr peyîn vat, serê serebûtî ra 6 serrî derbaz bi zî ne kiştoxêk ame tepiştiş û ne zî ameyo destbendkerdiş û wina vat: "2 serrê destpêk de bê qerarê nimite îfadeyê tu kesêk nêameyo girewtiş. Semedê nê zî ma nêzanê cipersayîş kam ci sewîye de yo. Semedo ke serê dosya de qerarê nimite esto.”