Medya Uren

 

AMED - Cinîyan derheqê tecrîdê serê Rayberê PKKyî Abdullah Ocalanî de yeno kerdiş wina vat: "Tecrîd beno sebeb ke Kurdistan û Tirkîya de kaos girs bibo. Şikinayîşê tecrîdî do tesîrê xo serê heme Rojhelata Mîyanên bikero. Ma zanê ke safîkerdiş Îmraliyî de yo. Îmrali rayîrê safîkerdişê problemanê Rojhelatê Mîyanên o."

 

Rayberê Partîya Karkeran ê Kurdistanî (PKK) Abdullah Ocalan 15ê Sibata 1999 ra Tirkîya de binê tecrîdêk giran de rehîn yeno girewtiş. Tecrîdo ke bi serran o dewam keno, resayo sewîyeya tewr giran. Hemverê tecrîdî her ke şino nêrazîbîyayîşê şarê kurdî zêde beno. Cinîyan derheqê tecrîd û û polîtîkayê hemverê kurdan de yenê kerdiş reaksîyonê xo ramojnayî.

 

'Her çî bi rêxistinkerdiş mimkun o'

 

Hemsereka HDPyî ya bajarê Manîsayî Ayla Gumuştaş dîyar kerd ke şexsê Abdullah Ocalan de heme tepişteyê sîyasî û kurdî binê tecrîdêk giran de yê û wina vat: "No tecrîd hêrişêko lêşin hemverê kurd û cinîyan o. Birêz Abdullah Ocalan seba cinî koletîyê mêrde-dewlete qebûl nêkerê înan aya kerd. No çî bi sebeb ke ewro bi hezaran cinîyê kurdî bi xoverdayîş hemverê koletî vindenê. Zanê ke rêxistinbîyayîşê cinî, rêxistinbîyayîşê komelî yo. Bi nê rengî zî bê guman do serkewtiş zî bidest bikerê. Coka tecrîd tewr zêde tesîr serê cinîyan de keno. Eke ma şarêk xo nas kenê yê û bi esil ê ganî ma tecrîd û tesîrê ci baş bierjnê û hemverê nê vejîyê. Lazim o ma xo zîndanê ser akerdeyan ra serbest bikerê. No zî bi rêxistinê cinîyan bi ca bêro. Ganî ma polîtîkayê înan dişminî veng vejê."

 

'Azadîya rayberî azadîya şaran a'

 

Selehet Tergay dîqet ant serê azadîya Abdullah Ocalan û wina vat: "Ê bi amancê ke şarê kurdî bikerê binê tecrîdî, rayberê kurdan tecrîd kenê. Birêz Abdullah Ocalan tena kesêk nîyo, o rayberê şarêke yo. Eke birêz Abdullah Ocalan azad bibo, do şarê Rojhelatê Mîyanên zî azad bibo. Îmralî rayîrê safîkerdişê problemê Rojhelatê Mîyanên o. Hemserekê HDPyî û xeylêk kurdî seba fikir û fehmê xo zîndanan de yenê verdayîş. Heme zîndanan de binpaykerdişê heqan dewam kenê. Bi taybetî zî tepişteyê nêweşî ke rewşa înan giran a, nê probleman  kûr ciwîyenê. Lazim o sere de tepişteyê nêweşî û heme tepişteyê sîyasî bêrê veradayîş."

 

'Tecrîd beno sebebê kaosan'

 

Kevser Şîşman zî wina qal kerd: "Şexsê Birêz Abdullah Ocalanî de heme tepişteyî û şarê kurdî binê tecrîdêk giran de yê. Hemverê nê bi taybetî zîndanan de reaksîyonê girsî ameyî ramojnayîş. No bes nîyo. Ganî reaksîyonêk bi hêz bêro ramojnayîş. Tirkîya de edalet çin o. Lazim o ma bi xo edalet bîyarê. Yê ke nêheqî kenê bêvengîya ma ra kêfweş benê. Nika tena kurdî ney heme Tirkîya mîyanê kaosê tecrîdî ya. Tesîrêk pîl ser de keno. Senîn ke Tirkîya tecrîd giran kerd, kaos pey kaosî de rî da."