MERKEZÊ XEBERAN - Derheqê dersê kurdî yê weçînaye de Platformê Ziwanê Kurdî nuşteyêk weşanayî û veng dayî  ke keyeyî seba tutanê xo dersê kurdî yê weçînaye biweçînê û ziwanê kurdî wayîr vejîyê.

 

Wendegehê mîyanên ê girêdayê Wezaretê Perwerdeyî Mîyanneteweyî yê Tirkîya, prosesê weçînayîşê dersê yê seba Serra Musnayîşî û Perwerdeyî yê serra 2022-2023yê bêro dayîş 3yê çeleyî de dest pêkerd. Do no proses heta 21ê çeleyî de dewam bikero û kesê ke biwazo dersê weçînayî seba tutanê xo biwazê ganî heta 21ê çeleyî de mudurîyê wendegahan rê neql bikerê. Bernameyê Wezaretê Perwerdeyî Neteweyî yê Tirkîya de xeylêk dersê weçînayî estê. Dersê kurdî yê bi lehçeyê kurmancî û kirmanckî zî binê nameyê, "Lehçe û Ziwanê Ciwîyenê" de yenê dayîş. Platformê Ziwanê Kurdî, seba dersê kurdî yê weçînaye eşkarîyêk nuşteyî da.

 

Platformî eşkerayê xo de dîyar kerd ke her çiqasî amancê înan ê sereyîn heme perwerde bi ziwanê dayîke bibo û vat: "Dersê weçînayîşî helwestêk ziwanî yo. Ma nê îmkanê çiqas baş bi ca bêrê, do berê ziwanê dayîke zî abibo. O wext do hûmara mamosteyê ziwanê kurdî zêde bibo û do unîversîteyî wendekran perwerde bikerê. Mamosteyê kurdî ke estê ê zî bi no hawa benê wayîrê karî. No zî seba xurtkerdişê perwerdeyê bi ziwanê kurdî destkewtişêk pîl o. Na babete de çiqas zor û zehmetî bibo zî, ganî dayîk û pî wayîrê ziwanê kurdî vejîyê.

 

Gelî kurdan! keyeyê xo de, kuçe û bazaran de bi kurdî qisey bikerê. Sîyaset bi kurdi bikerê! Ma sey Platformê Ziwanê Kurdî vengdayîşê heme kurdan kenê ke wendegehan de dersê ziwanê kurdi weçînê. Çi Kurmanc çi Zaza bê cîyabîyayîş, ganî tutê ma wendegehan de ziwanê xo weçînê. Ewro xebata perwerdî de no heqêq o, ganî heqê ziwanî bi hişmendî bêro xebitnayîş. Vengdayîşê ma heme partiyên sîyasî, sazgehê sivîl, medyaya kurdî, roşnvîr û hunermendan rê no yo; her kes hetê xo ra wa wayîrê ziwanê kurdî vejîyo. Nuştiş, wendiş û qiseykerdişê bi ziwanê Kurdi wa bibo helwestêk xozayî û netewî mîyanê komelê Kurdan de."