Hikmet Tunç

 

WAN - Rojnamegerê ke seba serebûtê eştişê di welatijê helîkopterî yê Qezaya Şaxî ya Wanî kerdibî xebere û dewa înan rê amebî akerdiş, Nazan Sala wina vat: "Şexsê 5 rojnamegeran de heme rojnamegerî ameyî muhakemekerdiş. Ez welatêk ke heme embazê ma yê rojnamegerî bieşkê hawayêke azad rojnamegerî bikerê, hêvî kena."

 

2020'î de Şaxê yê Wanî de Servet Turgut û Osman Şiba helîkopter ra amebî eştiş. Nazan Sala, Şehriban Abi muxabirê Ajansê Mezopotamyayî (MA) Adnan Bilen û Cemil Ugur seba ke nê serebûtî rayaumumî rê  neql kerdî, temmuza 202'î de amebî destbendkerdiş û dima ra ameyî tepiştiş.

 

Binpaykerdişê heqan zîndanan de dewam kerdî

 

Prosesê cipersayîşê rojnamegeran de rojnamegerî seba xebera ke viraştî, waştî bêrê cezakerdiş. O wext de zî binpaykerdişê heqan zîndanan de dewam kerd. Şehribane û Nazane bi mehnaya pandemî hucre de ameyî tepiştiş û û bi tepişteyê edlî dir eynî korîdorî de ameyî verdayîş û bi binpaykerdişê heqan dir rî bi rî ameyî verdayîş. Nazane seba lingê xo yê protez demê dijwar derbaz kerd. 

 

Rojnamegerî dimayê 6 mengan tepişte mendî, bi paştdayîşê rayaumumî û embazanê xo 2yê Nîsane de roniştişê yewin de ameyî tehlîyekerdiş. Rojnamegerê ke bi şerdê kontrolê edlî serbest ameyî veradayîş, mecbûr mendî ke her hewte îmza bidê.

 

Derheqê 5 rojnamegeran de qerarê beratî ame dayîş

 

Roniştişê qerarî yê dewaya vizêr 5in Dadgeha Cezaya Giran ya Wanî ame vînayîş de 5 rojnamegerî bi îdiayê, "endamîya rêxistine" ameyîne muhakemekerdiş, berat kerdî. Derheqê Nazane de parekerdişêk 2007in de sey bahane ame ramojnayîş û serrêke û 3 mengî ceza seba Nazane ame dayîş.

 

Rojnamegere Nazan Sala serê prosesê dosya û qerarê beratî de ercnayîş kerd.

 

'Serrêke û 3 mengî hukmê ceza ame dayîş'

 

Nazane dîyar kerd ke seba qerraê beratî ganî ma şaş nêmanê û wina vat: "Şexsê 5 rojnamegeran de heme rojnamegerî ameyî muhakemekerdiş. Seba prosesê pandemî zî ma zîndan de demêk xidar derbaz kerd. Prosesê serrêke û nîm de ma nêeşkayî meslegê xo bikerê. Bi rayîr û metodê cîya waştî ke meslegê ma yê rojnamegerî asteng bikerê."

 

'Nedim û Zîya tepişte yê'

 

Nazane seba qerarê dadgehe wina vat: "Ma kêfweş kerd, labelê verê sereyê ma de Zîndanê Asayîşê Berzî yê Wanî Zîya Ataman, Nedim Turfent û xeylêk embazê ma yê bînî tepişte yê. Ma hêvî kenê ke no netîceyê ma, yê bînan rê bibo nimûne. Ez welatêk ke heme embazê ma yê rojnamegerî bieşkê meslegê xo bi azad bikerê hêvî kena."