Marta Somek

 

STENBOL - Siyasetmedaran diyar kerdî ke hêrişê hemver HDPyî bi destê îqtîdarî yenê kerdiş û ganî cewabêk xurt bêro dayîş û vatî: “Ma nêtersenê, peyser game nêerzenê. Ma kîşte partîya xo de yê.”

 

28ê kanûne de hêrişkar Muhammet Eren Sutçu bi kardî û sîleh hêrîşê Partîya Demokratîke ya Şaran (HDP) Bahçelîevler kerd û di kesî birîndar kerd. Hêrişkar çar rojan destbend mend û sewqê 3in Dadgeriya Cezaya Sulhî ame kerdiş. Hêrişkar bi şertê hepsê keyeyî ame veradayîş. Komeleya Huqûqnasê seba Azadîye (OHD) îtîrazê babete kerdî û hêrişkar newe ra sewqê Dadgeha Cezaya Sulhî ame kerdiş û 10ê çele de ame tepiştiş.

 

Sîyasetmedarî, rêxistinê komelê sivîl û sazgehan reaksîyon nîşanê hêrîşê dayî û vatî kîşte HDPyî de yê. Siyasetmedaran da zanayîş ke hêrîşê hemverê HDPyî sîstematîk bîyê, gumanbar bi polîtîkayê bêcezaverdayîşî yenê xelatkerdiş û vatî ganî hemverê her tewir hêrîşî bibê yew.

 

‘Hêrişêk plankerde, organîzekerde’ 

 

Temsîlkara Alinterî Muruve Kuçuk vat, hêrişê Bahçelîevler plankerde bîyo û vat: “HDP dînamîkêk xoverdayîşê komelî temsîl keno û seba ke bi taybetî şarê Kurdî temsîl keno, beno hedefê hêrîşan. Nê krîzî de esasê ci de şexsê HDPyî de, hêrîşêk organîzekerde yê seba tehdîd, tersnayîşî ameyo kerdiş. Bi veradayîşê gumanbarî zî nê mesajî danê. Hêrişkarî birîndarkerdişî dir sewqê dadgehe ameyî kerdiş la esasê ci de vanê ‘ez seba qetilkerdişî ameya’. Eke sîlehê ci xera nêbîne do qirkerdişêk biameyîne kerdiş la wa rind bizanê ma peyser game nêerzenê.”

 

‘Hêzê paştdayîş danê estê’

 

Hemsereka partiya Xelasîya Newe ra yê Sosyalîstî (SYKP) ya Stenbolî Gurşenay Dalveren zî dîyar kerd ke nê hêrişê nîjadperest tesaduf nîyê û nê hêrîşê wina bi destê hêzê mîlîs yê dewlete bi ca yenê. Gurşenay wina vat: “Her tim hemverê HDPyî hêrîşê nîjadperest bî. La gumanbar bi tena sereyê xo nê nêkenê. Pey înan de hêzî estê. Pêwa ke awanîyê partîye hetê polîsan ra yenê taqîbkerdiş zî hêrîş yeno kerdiş. No zî nîşan dano ke plankerde bi ca yeno. Organîzkerde yê. Hêrişkarî pêwa ke di kesî birîndar kerd ame veradayîş. Hêrişkar ame dermankerdiş û eleqeyêk taybet nîşanê ci dayî. La  tepişteyê zîndanan nêeşkenê derman bibê. Xeylêk tepişteyê nêweşî yê giran nînê dermankerdiş, hewcedariyê xo nêeşkenê bi ca bîyarê, serbest nînê veradayîş.”

 

‘Ma do vengê xo her ca de berz bikerê’

 

Vervatoxa HDPyî ya Stenbolî Besra Îşsever zî wina vat: “Nê hêrîşê yewin nîyê. 17ê Hezîrane de zî hêrîşê HDPyî yê Îzmîrî ame kerdiş û Denîz Poyraz qetil kerdî. Ma nê hêrîşê nîjadperestî qebûl nêkenê. Demê peyîn de hemverê HDPyî xeylêk ca de hêrişî yenê kerdiş. Hemverê nê ma sey HDPyî vengê xo berz bikerê. Seba vatişê îqtîdarî yê demê peyîn HDP hedef yeno girewtiş. Berpirsîyarê hêrîşê hemverê HDPyî îqtîdar o. Ma do hemverê hêrîşan têkoşîn bikerê. Ez veng dana heme kesî ke ma bi yewbîyaye hemverê hêrîşan bibê cewab.”