Şehrîban Aslan

 

AMED - Avûkate Çîgdem Sevîmlî bale ant serê problemê ke cinî ciwîyenê û dîyar kerd ke cinîyê ke şîdet vînenê wexto ke muracatê asayîşî kenê, bi zehmetîyan dir yenê rî bi rî û hewl danê ke peyser game bierzê.

 

Dimayê pêkerdişê Stenbolî hetê Serekkmarê AKPî Tayîp Erdoganî ra ame feshkerdiş dima şîdetê serê cinîyan zêde bi. Na rewşe nêzdîbîyayîşê qerekolan yê  ke hemverê cinîyan zî vejeno werte. Cinîyê ke şîdet vînenê muracatê qerekolan kenê uca de caardişê mêbîyankerdişî yenê û hewl yeno dayîş ke peyser game bierzê. Sewbîna gerreyê cinîyan zî cidî nîno girewtiş. No zî beno sebebê ke cinî peyser game bierzê û cinîyan mecbûr kenê ke agêrê cayê şîdetî.  Netîceyê nê de cinî qetilkerdişî dir  yenê rî bi ri.

 

Temsîlkarê Merkezê Heqê Cinîyan ê Baroyê Amedî, avûkate Çîgdem Sevîmlî, derheqê caardişê hemverê cinîyan de qisey kerd.

 

'Tesîrê hêzê asayîşî serê gerrekerdişî'  

 

Çîgdeme vat cinî wexto ke serebûtî dir rî bi rî manenê, vernê de muracatê qerekolan kenê û vat: "La nuqtaya cigêrayîşê edeletî yê cinîyan de travmaya diyîn yena ciwîyayîş. Sewbîna zî tesîrêk negatîf esto. Nimûne; 2020 de 5 cinîyan muracatê ma kerd, dîyar kerdî ke  şîyê qerekolê cîya la muracatê înan nêameyo qebûlkerdiş. Cinîyêke dîyar kerd ke pêwa rêça şîdetî serê bedenê ci de bîyo zî qerekole aye şawita qerekola cayê ke ci de îkamet kena. Yanî cinîya mexdur mabêne qerekolan de berdê û ardê. Demo ke cinî xo resna ma, vat pêwa rêça pirodayîşî zî polîsan muracatê ci qebul nêkerdê. Ma zî bi israr vat, raporê pirodayîşê bigî û sey delîl pêşkêş bike.”

 

'Sîstemê bîyaye de problem esto'

 

Çîgdeme wina vat: “Vernîya qerarê antişê Pêkerdişê Stenbolî, sererastkerdişê baş yê cinîyan pawitêne estbî. Qanûnê hûmara 6284 zî yew nînan ra bi. Sererastkerdişê TCKyî de yê dima ra ameyî kerdiş de nuqteya ke nê safî bikero de bi.  Pêkerdişê Stenbolî seba her kesî asayîş bî."

 

'Cinî mecbûr manenê ageyrê cayê ke şîdet bi înan yeno kerdiş'

 

Çîgdeme qiseykerdişê xo wina dewam kerd: “Tirkîya xo têkoşînê hemverê şîdetê cinîyan de, nuqteyêke girîng de vînena. La pratîkê înan diyar o ke roj bi roje peyser agêrenê. Dosyaya cinîya  bi nameyê Hatîce bî. Xeylêk rey muracatê qerekole kena. Raporê ci estbî, waştişname bî. Ameye verê ma û seba asayîşê ci stargeh pêşnîyaz ame kerdiş. Seba Fatma û kênaya aye problem nêbi la seba lajê aye 12 serre problem bi. Coka nêşî stargeh. Cinî mecbûr manenê ke agêrê şêrê cayê şîdetê ke bi înan yeno kerdiş. Hatîce zî seba nê nêşî stargeh. Tehdîd û şîdetê gumanbarî dewam o. Me heme delîl dayî dozgerî. Ma pawitiş nêzdî ra waşt. Dozgerî vat Walîtî nê qerarî dano, ganî cinîye muracat bikero. Ma vat Hatîce nêeşkena keye ra vejîyo û muracat bikero. Nê ser de dozgerî vat do aye waştiş bikero. La no waştiş hetê walîtî ra ame redkerdiş û vatibi bi hemkarîya hêzê asayîşî wa Hatîce muracatê walîtî bikero. Hatîce pêwa tehlukeyê cuye bi, keye ra vejîya. Nê ser de gumanbar şino keye û hêrîşê tutêke keno. Demo ke merdim nê verê çiman de bigîro, yeno vînayîş ke asayîşê cinî verê çiman de nîno girewtiş."

 

DDB ra seba cinîyan qerarê nimûne

 

Çîgdeme tewr peyîn wina vat: “Mengêke verê Îzmîr de cinîyêke rê şîdet amebi kerdiş û qerarê taqîbnêkerdişî amebî dayîş. Dimayê nê muracatê Dadgeha Desturê Bingehîn (DDB) da. DDByî derheqê  çîyê ke ciwîyaya de qerarê binpaykerdişê da û qerarê ameyo dayîş demê peyîn de babeta şîdetê serê cinîyan de qeraro tewr baş bi.  Demo ke merdimî ewnîyenê qerar ra, pêwa Pêkerdişê Stenbolî ameyo  fesihkerdiş zî dayîşê qerarêk wina xeylêk girîng o."