Sema Çaglak

 

Tehda û hêrişê hemverê sîyasetê Kurdan her ke şino zafêr beno. No tehda û hêrişî zî tewr zafêr serê HDPyî de xo ramojneno. 18ê Hezîrane de Îzmîr de hêrişê awanîya Îzmîrî amebi kerdiş û xebatkara partîye Denîz Poyraze amebî qetilkerdiş. 28ê Çeleyî de zî ame waştiş ke Rêxistinê HDPyî ya Bahçelîevlerê Stenbolî qirkerdişêke bikerê. La pêwa nê hêrişan ke eşkera yeno kerdiş zî hêrişkerdoxî  yenê veradayîş û qatilî raste rast nînê muhakemekerdiş û hêzê dimayê qatilan zî nînê eşkerakerdiş.

 

Sîyasetmedare Meryem Yildiz û Hemsereka Komeleya 78î Halîse Batgî derheqê hêrişanê serê HDPyî erjnayîş kerd.

 

Hemşaredara Erxenîyî ke vera aye de qeyûm  ame tayînkerdişî Meryem Yildiz, dîyar kerd ke îqtîdar bi hedefkerdiş û hêrişan duştê sîyasetê Kurdan de wazeno xo serê lingan de vindarno û wina qisey kerd: "Xebatê dîplomasîyê HDPyî hem mîyanê xo de hem zî teverê xo rê ramojneno ke HDP her ke şino pîl beno. Averşîyayîşê HDPyî xo dir xeylêk hetê pozîtîfî ra zî ano. Nê prosesî de fikrê HDPyî de israrkerdişê demokrasîyî de verhîrayêr bî. Xusûsî zî dimayê kongreyê HDPyî, parlementoya Ewrûpa ra xeylêk serdanî ameyî kerdiş. Nê serdayîşan de ma mesajê ke tever de zî HDP paştgirewtene gêna vînenê. Labelê ma îqtîdarîyêka yewperestî dir rî bi rî  yê. Coka hende hêrişî û tehdayî duştê partîya ma rê yenê kerdiş. Hetêk bîn ra zî dewaya girewtişê HDPyî esta. Sebebê ê hende hêriş û tehdayan vindîbîyayîşê hukmatê AKP-MHPyî yo. Îqtîdar her ke şino hêzê xo vinî keno. Hêz ke vîndî keno zî wazeno bi polîtîkayê yewperestî û netewperestî komele bixapêno û xusûsî zî krîmînalîzkerdişê HDPyî wazeno xo rê polîtîkayê ke bîyaro meydan. Ê zî zanenê ke heta HDPyî dir nêşêrê, nêeşkenê ser de bikewê coka bi heme hêzê xo, hêrişê HDPyî û Kurdan kenê."

 

'Dimayê hêrişan duştê HDPyî dir sûcêke organîzekerde  esto'

 

Meryeme ard ziwan ke hêrişê duştê HDPyî de sûcêke organîzekerde esto û wina vat: "Kesêke, destê înan de sîleh senîn bi asanî eşkenê û hêriş kenê. Eşkerayo ke nê de sûcêke  organîzekerde esto. Hetê heme kesan ra yeno zanayene ke HDP paştgirewtişê kamî bikero, o beno îqtîdar. Nika zî heme hetkarê muxalîfî bi vengo berz razînêbîyayîşê xo yê duştê îqtîdarîya AKP-MHPyî anê ziwan. O şero ke mîyanê Tirkîya de yeno kerdiş, şerê komelî yo. Nê şerî de zî razînêbîyayîşê duştê polîtîkayê AKP-MHPyî vengê ke berz ano rojevê HDPyî. Coka tewr zafêr zî duştê HDPyî hêrişî yenê kerdiş. Bi serran o bi nê metodî hem tever de hem zî problemanê mabênê xo de Kurdî yenê xebetnayîş. La belê Kurdî na rewşe nêwazenê û sîyasetêke demokratîk amanc kenê."

 

'AKP-MHP her ke şino zeîf beno'

 

Meryeme eşkera kerd ke urf û adetî  û kokê HDPyî zaf kano o û ewro, o kokê xo miyanê komele de mojneno ra. Meyreme dîyar kerd ke averşîyayîşê sîyasetê Kurdan hukmato bîyayeyî aciz keno û wina vat: "Destê nê îqtîdarî de seba xapênayîşê şarî êdî qet çîyêk nêmend o. Ma eşkenê vajê ke êdî AKP-MHP qedîya yo û zeîf bîyo. Zanenê ke êdî nêeşkenê ser de bikewê û bi hêz bibê, sewbîna yeno vînayene ke polîtîkayê înan mîyanê komele de zî yeno teşhîrkerdiş. Verê nê ra zî wazenê newe ra serê îdeolojîyê netewperestîye vengê xo yê bîyayeyî bipawê û bigîrê. Îqtîdaro bîyaye tu beşêk ra verpersêke nêeşkeno bigîro. Heme berî ser de yenê girewtiş."

 

'Bêtesîrkerdişê nê îqtîdarî HDPyî ra derbas beno'

 

Meryeme vat ke, bi hêrişanê duştê HDPyî yeno waştiş ke mesaj bidê muxalîfan û wina ci de şî: "Xusûsî zî  wexto peyîn de beşê muxalîfî zafêrî vengê xo duştê polîtîkayê hukmatî berz kenê. Bêtesîrkerdîşê nê hukmatî yo ke çimanê xo persayîşê komele ra gêno HDPyî ra derbas beno. Coka ke vindarnayîşê HDPyî tim eşkera ya. Êdî vindarnayîş û qenaatê beşê muxalîfan zî eşkera beno. Coka no îqtîdar bi hêrişan hemverê HDPyî wazeno mesaj bido beşê muxalîfan zî. Nê hetî ra ma tehdîdê serê Şaredarîya Stenbolî eşkenê fînak bidê yan zî tayînkerdişê qeyûmî yê Unîversîteya Bogazîçî yî ra. Nê pêro girêdayeyê yewbînan ê. Îqtîdarîya AKP-MHPyî no zîhnîyetê qeyûmî ra hêdî hêdî weyîkerdiş aver eşt. La di nê averşîyayîşê zîhnîyetê xo de tim zî HDP xebetna yo. La ê zî baş vînenê ke HDP her ke şino pîl beno. Ewro sîyasetê HDPyî heme maydananê komele mîyanê xo de hewêneno."

 

'HDP her ke şino pîl beno'

 

Meryeme, wina peynîyê qisanê xo ard: "Kongreyê HDPyî yê ke bi coşêke pîl ame organîzekerdiş ke hêzê HDPyî zafêrî ame vînayîş. Ganî baş bêro zanayene ke zemînê HDPyî zemînêke polîtîk o û o zemîn hende bi asanî nîno mexlûbkerdiş. Zêdebîyayîşê hêrişê duştê HDPyî dir wayîrvejîyayîşê HDPyî zî zafêr  keno. HDP bi milyonan o û têkoşîna xo binê banê awanîyêke de sînor nêkeno."

 

'Hêrişê duştê HDPyî, hêrişê duştê sîyasetê demokratîkî yê'

 

Hemsereka Komeleya 78î Halîse Batgî zî qisey kerd û dîyar kerd ke hêrişê duştê HDPyî huqûq û sîstemê sîyasetê Tirkîya nîşan dano û wina vat: "Ma hêrişê duştê HDPyî şermezar kenê. Hêrişê duştê HDPyî bêhuqûqîyê dewlete nîşan dano. Awankerdişê HEPî ra bigîrê heta nika tehda û hêrişî serê sîyasetê Kurdan de bîbî û nê hêrişî ewro zî dewam kenê. Hêrişê duştê sîyasetê Kurdan eynî wextî de hêrişê duştê sîyasetê demokratîkî yo. Sîyasetê xo yê lêşin her demî de bi metodêko cîya nîşan dano. Nika zî bi sîleh û kardan hêrişê xebatkaranê partî kenê. Ê kesê ke destê înan de sîlehî estê û hêriş kenê, ê sîlehan ça ra gênê? Îzmîr de Denîz Poyraze amî qetilkerdiş la qatilê aye bi tewirêke raste rast nêame sûcdarkerdiş. Stenbol de kesê ke waşt awanîya HDPyî de qirkerdiş bikero, serbest ame veradayîş. Nê nizdîbîyayîşî bi tu şeklêke nînê  qebûlkerdiş û nizdîbîyayîşê şermezarkerdişî yê. HDP partîyêka fermî ya û hêrişê duştê HDPyî  tersê înan o ke hemverê sîyasetê demokratîkî nîşan danê."