Oznur Deger

 

ENQERE - Avûkata qirkerdişê Konyayî Ozum Vurgun vengdayîşê beşdarbîyayîşê roniştişê yewin ê  hêrişê nîjadperestî kerd û vat: "Do têkoşînê ma yê huqûqî dewam bikero. Têkoşînê bi rêxistinkerde hêz dano û dano qezenckerdiş."

 

30ê Temmuze de qezaya Meramî de 4 ci ra cinî 7 kesî keyeyê Dedeoglullari yê Qersî ra hetê Mehmet Altun ra ameyî qetilkerdiş. Vernîya ke keyeyê Dedeogullari bêrê qetilkerdiş 12ê Gulane de endamê keyeyê Keleşî û Çalik hêrişê keyeyî kerdibî. Roniştişê hêrişê nîjadperest ê yewin, siba 8in Dadgeha Cezaya Giran ya Konya de bêro vînayîş. Dimayê hêrişê nîjadperestî keyeyê Keleşî û Çalik 6 kesî ameyî tepiştiş labelê xêrcê Ali û Lutfi Keleş heme versucî ameyî veradayîş.

 

Keyeyê Dedeogullari muracatê hîn cayê berpirsîyaran kerdibî ke bêrê pawitiş la no waştişê înan bi ca nêame û ameyî qetilkerdiş. Seba hêrişê nîjadperestî yê 12ê Gulane iddianame ame amadekerdiş labelê mîyanê îddianameyî de vatişê hêrişkaran ê "Ma ulkucu yê, ma do şima kurdan tîya nêhewênê" ca nêgirewt.

 

Derheqê roniştişê hêrişê nîjadperest ê ewilî de avûkatanê dewa Ozum Vurgun erjnayîş kerd. 

 

'Her di serebûtî û dosya pê dir têkildar ê'

 

Ozume da zanayîş ke hêrişê 12ê Gulane seba qirkerdişê Konya bingehêk bi û wina dewam kerd: "Keyeyê Dedeolullari îfadeyê xo de vatişê versûcan ê nîjadperestî ardê ziwan. Zabitnameyê dosya de girîngî û telukeyê serebûtî verê çiman de fîneno ra. Yaşar Dedeogullari ke ame qetilkerdiş dimayê hêrişê 12ê Gulane de derheqê serebûtî de beşdarê bernameyêke xeberan bibi. Uca de ano ziwan ke hêrişêk nîjadperestî ameyo kerdiş. Ma zanê nê her di serebûtî û dosya pîya têkildar ê û dewamê yewbînan ê."

 

'Têkoşîn dano qezenckerdiş'

 

Ozume vat, Komeleya Huqûqnasan ê seba Azadîye (OHD) semedê di dosyayê cîya nêzdîyê 30 avûkatî pawitiş bikerê û vat: "Ma bi rêk û pêk serê dosya de cigêrayîş kerd. Ma veng danê heme baro, rêxistinê komelê sîvîl û meslegdaranê xo ke wayîrê dewaya keyeyê Dedeogullari vejîyê û wareyê têkoşînê huqûqî de verê ma de ca bigîrê. Do têkoşînê ma yê huqûqî dewam bikero. Têkoşînê bi rêxistinkerde hêz dano û dano qezenckerdiş."