STENBOL - ÎHDyê Stenbolî bi keyeyê tepişteyan dir bi sloganê, ‘ma zîndanan de merdişan nêwazenê, cuye pawenê’ menga çeleyî de her roja şemeyî mabêne saet 14.00 û 17.00ine de bername virazneno. Seba bernameyî vengdayîşê tewrbîyayîşî ame kerdiş. 

 

ÎHDyê Stenbolî û keyeyê tepişteyan derheqê binpaykerdişê heqan ê zîndanan bi sloganê, ‘ma zîndanan de merdiş nêwazenê, cuye pawenê’ plansazîyê çalakiya mengêke kerdî. Çalakî hewteyê vîyarte de roja şeme şubeyê ÎHDyê Stenbolî de ame  destpêkerdiş û no hewteyo diyîn yeno kerdiş. Sereka şubeyê ÎHDyê Stenbolî Gulseren Yolerî dîyar kerd ke hemverê binpaykerdişê heqan ê zîndanan de xebatê înan bêmabên dewam bikerê.

 

‘Ma wazenê hîsgêrî awan bikerê’

 

Gulserene dîyar kerd ke bi 10 serrî yo sey şube bi ‘roniştişê F’ bale ancenê serê rewşa tepişteyê nêweşan û vat: “Bi nê çalakîyan ma babete ard rojeva komelî û ma waşt ke biancê serê na nuqta. Coka ma çalakîya ‘ma cuye pawenê’ organîze kerd. Zîndanan de rewşa tepişteyê nêweşan giran a. Seba nê ma waşt ke hîsgêrî awan bikerê. Bi nê çalakî ma nê amanc kenê.”

 

‘Tena zîndan eleqedar nêkeno’

 

Gulserene dewam de wina vat: “Rolêke girîng ê keyeyan esto. La keye bi caardişê zîndana ê Tîpê F rê bi zehmetî ameyî têhet. Seba tepişteyî her tim yenê surgunkerdiş. Dûr ê. Problemî wina estê. Pêwa nê rêxistinê heq û huqûqî û keyeyî hîsgêrî dewam kenê. La no qîm nêkeno. Binpaykerdişê heqî yê cidî estê. Zîndanan de no di qat o. Çi heyf no problem tena zîndanan eleqeder nêkeno. Welat de binpaykerdişî yenê ciwîyayîş.”

 

‘Ganî waştişî verê çiman de bêrê girewtiş’

 

Gulserene vat, welat de haq, huqûq û demorkasî çin o û her kes nê ano ziwan û ganî wazenê zîndanan de verê çiman de bêro girewtiş û hewldayîşê înan oyo ke hîsgêrî awan bikerê, têkoşînê hemleyêk bîn aver berê.

 

‘Ma wazenê hêvî zêde bikerê’

 

Gulserene wina vat: “Ma wazenê ameyox de bi sohbet, belgefîlman her kesî bi hawayêke çalak tewrê nê prosesî bikerê. Ma wazenê bi têkoşînê xo hêvî xurt bikerê. Ma bi çalakîya ‘ma cuye pawenê’ wazenê şertê têkoşînî hîn tewr awan bikerê. Peynîya 4 hewteyî dima  serê pêşnîyazan do gamê bîn bêrê eştiş. Hêvîya ma oyo ke têkoşîn xurtr û rêxistinkerde bo.”

 

Vengdayîşê wayîrvejîyayîşî

 

Gulserene tewr peyîn wina vat: “Ma vernîya her çalakîya bernameyî eşkera kenê û veng danê. Her hewte roja şemeyî mabêne 14.00-17.00in de do bernameyê ‘ma cuye pawenê’ komeleya ma dewam bikero. Ma çiqas tewr bibê, tewrbîyayîş çiqas zêde bo, do tepişteyan rê bibê veng û hêvî.”