Medya Uren

 

AMED - Tepişteyê sîyasî hemverê binpaykerdişê heqan ê zîndanan de dîyar kerdî ke wa êdî vengê înan bêro eşnawitiş. Zîndanê Cinîyan ê  Amed û Zîndanê Tîpê Fyê Antalya de xeylêk tepişteyan keyeyê xo rê problemê ke ciwîyenê neql kerdî û dîyar kerdî ke ê do dest bi çalakîyan bikerê.

 

Zîndanan binpaykerdişê heqan her ke şino zêde beno. Hemverê tepişteyê sîyasî şert û mercê şîdet ê cuye yenê efrzkerdiş. Hetê weşî, tedawîkerdiş, asayîş û pakitî de probleman ciwîyenê û rexmê nêrazîbîyayîşî nînê safîkerdiş. Tepişteyê sîyasî yê ke Zîndanê Cinîyan ê Amedî de manenê hemverê nê nêzdîbîyayîşan, nêvejîyayî pêvînayîşê akerde û rewşe şermezar kerdî. Zîndanê Tîpê Fyî yê Antalya de zî tepişteyan bi rayîrê pêvînayîşê telefonî keyeyê xo neql kerdî ke ê do dest bi çalakîyan bikerê.

 

'Cigêrayîşêk pîl yeno kerdiş'

 

Mêrdeyê tepişteya sîyasî Selma Yilmaz ke Zîndanê Cinîyan ê Amedî de manena, Nazmî Yilmaz derheqê problemê ke tepişteyî ciwîyenê wina vat: "Selma her tim pêvînayîşê ke ma bi rayîrê telefonî dir ma kenê, problemê ke ciwîyena pare kena. Bi taybetî qalê nêberdayîşê nêweşxaneyî û cigêrayîşê zêde, kena. Vana heme eşyayê ma yê taybetî  temaşe kenê û hewil danê ke cigêrayîşê zitî bikerê. Ma hemverê  nê vejênê. Belê goreyê ke Selma vana, îdarekarê neweyî yê zîndanî bi israr nê metodanê xo dewam keno. No nêzdîbîyayîş keyfî yo goreyê qanûnî heqê merdiman o."

 

'Wa waştişê tepişteyan bi ca bêrê'

 

Nazmî dîyar kerd ke seba pandemî 2 serrî yo pêvînayîşê akerdê nêkerdê û vat: "Tutêk/e ma yo/a 5 serre esto/a. Prosesê 2 serran de bi tu hawa dadîye xo nêdîyo. Rewşa normalî de o/a zî verê dadîye xo de bi/î, labelê seba ke tut/e hetê weşîye de baş nîyo/a, nêeşkeno/a zîndan de bimano. Ma waştişê qiseykerdişê bi dîmen kerd. Seba ke heme zîndanan de seba tepişteyê edlî bi rayîrê telefonî pêvînayîşê bi dîmen yeno kerdiş. Labelê tepişteyê sîyasî rê Wezîrê Dade destûr nêdano. Pêvînayîşê ke heqê ma bi zî, seba ke zîndanan de binpaykerdişî bî, tepişteyî nêameyîne pêvînayîş. Ma bi desin keyeyê ke bajarê dûrî ra zî ameyê, verê berî de mendî. Ma waştişê sererastkerdişê şert û mercê zîndanî kenê. Wa waştişê tepişteyan bi ca bêrê."

 

'Wa êdî vengê ma bêrê eşnawitiş'

 

Merdima tepişteyê sîyasî Dîkran Çelîk ke Zîndanê Tîpê Fyê Antalya de yeno tepiştiş, Gulhan Çelîk zî derheqê binpaykerdişî de wina vat: "Dîkranî pêvînayîşê ke ma bi rayîrê telefonî kerd de problemê ke ciwîyenê qal kerd. Ey vat, hetê weşî de ê problemê pîl ciwîyenê. Înan nêbenê doktor yan zî bi bahaneyan, berdişê înan taloq kenê. Teberê nê de zî zilm kenê. Cigêrayîşan de zî şîdet kenê. Hetê psîkolojîk û fîzikî de hêriş tepişteyan yeno kerdiş. Dîkranî dîyar kerd ke înan qerarê çalakîyan dayo. Heta ke şert û mercê înan nêrê sererastkerdiş, ê do fek çalakîyan ra vera nêdê. Ma zî sey keye rewşa înan ra bi guman ê. Lazim o vengê înan bêro  eşnawitiş. Ma zî nê çî ra tesîr benê. Dîkranî zî peynîya qiseykerdişê xo de mi ra vat, çapemenî û rayaumumî rê neql bikerê wa êdî vengê ma bêro eşnawitiş."