ANQARA - Hemvervatoxa HDPyî Ebruye Gunay vat: ''Komel mecbur û mehkumê kutubanê sîyasîyan ê sîstemî nîyo. Coka seba rayîrê hîrêyînî cigêrayîşê ma dewam kenê.''

 

Vervatoxa HDPyî Ebru Gunay Merkezê Pêroyî yê HDPyî de kombîyayîşê çapemenîye de rojdem ercna.

 

Ebrûye qiseykerdişê xo de wina bale ant serê fezleke û vat: “Komîsyon ewro fezlekeyê serê Semra Guzel ercneno. Embaz û wekîlê ma zî kombîyayîşê komîsyomî de yê. Dima ma do derheqê babete de eşkerayîye bidê. Senî ke Wekîlê DEPî Meclîsî ra ameyî vetene AKP zî bi nê hawayî dest nano îradeyê şarê ma ser. AKPyî verî şaredarîyê ma xesp kerdî, dest na wekîlîyanê wekîlanê ma ser û wekîlê ma tepiştî. AKP hema zî vera îradeyê şarî darbeyanê xo rê dewam keno. Nika zî vera Semra Guzel kampanyaya lînçî yena kerdene.”

 

Ebrûye wina vat: “Komel mecbur û mehkumê kutubanê sîyasîyan ê sîstemî nîyo. Coka seba rayîrê hîrêyînî cigêrayîşê ma dewam kenê. Ma 18ê çeleyî de EMEP, EHP, Halkevlerî, SMF, TÎP, TOPî reyde kombîyayîşêk kerd. No kombîyayîşo verên bi. Seba sîyasetî girîng bi. Ma kombîyayîşî ra dima eşkerayîyêka hempare daye. Pêro bindest, mexdûr, têkoşînerê cinîyî û ciwanan pare kerd ê do awankerdişê hemwelatîya têdûşte ma do têkoşînî rê dewam bikerê. Vera krîzanê welatî, vera faşîzmî ma do waran û kuçeyan de rayîranê têkoşînî nîqaş bikerê. Asta hîra de qerardarîya ma ya geşkerdişê têkoşînî do dewam bikera.”

 

Ebrûye tewr peyîn wina vat: “Serra 2022î de her saete vaya her çîyî zêdîyena. Derdê AKPyî şar nîyo. Tek derdê AKPyî îqtîdarê ci yo. Ma sey HDPyî reyna soz danê ke ma do şaranê Tirkîya rê rayîrê sîyasetê alternatîfî abikerê û xeta têkoşînî xurtêr bikerê. Ma armanc kenê ke meseleyan çareser bikerê û Tirkîya de bi aramî biciwîyê.”