STENBOL - Cinîyan reaksîyon nîşanê şîdetê serê hunermendê kuçeyan yê ke Kuçeyê Îstîklalî de muzîkê Kurdî pêşkêş kenê ke hetê polîsan ra rî bi rî mendî û vatî: "Bi nê hêrişan nêeşkenê vernîya Ziwanê Kurdî bigîrê, no kultur bi ti hawayî nîno bêvengkerdiş. Ziwanê Kurdî rûmet û bîyayîşê ma yo, kurdî çayê dinya de benê wa bibê wa ziwanê xo yê dayîke qisey bikerê."

 

Hêriş û polîtîkayê asîmîlasyonê yê serê ziwanê kurdî roj bi roje zêde beno, demê peyîn de Taksîmê Stenbolî de nimûneyêk bîn o şîdetê  serê Ziwanê Kurdî ame ciwîyayîş. Hunermendê kurdî yê kuçeyê Îstîklalî yê Taksîmî ke şar xeylêk hunermendê kuçeyan de deyîran n pêşkêş kenê, 29ê Çele de polîsan şîdet kerd û tehdîd kerdib. Xeylêk cayan ra reaksîyonê hemverê hêrişê hunermendê ke polîsan înan destbend kerdî û hacetê înan desteserkerdî dewam kenê.

 

'No kultur nîno bêvengkerdiş'

 

Hunermenda Merkezê Kulturî yê Mezopotamyayî (NÇM) Nuray Balîk, dîyar kerd ke hêrişê hemverê Şarê Kurdî bê tehamûliyê hemverê şarê Kurd û Kulturê Kurdî yo. Nûraye vat: "Her çiqas kuçeyê Îstîklalî de xeylêk kesî bi kultur û ziwanê xo deyîran vanê zî çira kurdî yenê destbendkerdiş? Bi nê ma vînenê ke hemverê kurdan û Kulturê kurdî nêrazîbîyayîşêk pîl esto." Nûraye dewam de wina vat: “No kultur bi tu hawayî nîno bêvengkerdiş, deyîrann zî nêeşkenê asteng bikerê. Bêrê ma vengê xo berz bikerê û vernîya nê serebûtan bigîrê."

 

'Ma bi ziwanê xo estê'

 

Aktîvîsta Tevgerê Cinîyan ê Azadan (TJA) Felek Erdem zî wina vat: “Nê hêrişî nêeşkenê vernîya ziwanê kurdî bigêrê. Ziwanê Kurdî rûmet û bîyayîşê ma yo. Ma bi ziwanê xo estê û ma do bi ziwanê xo biciwîyê. Hêrîş bi seserran o bajarê pîlî yê Tirkîya hemverê ziwan û kulturê kurdî esto. Kurdî her tim bi ziwanê xo ciwîyayê. Do ameyox de zî wina bo."

 

'Ziwanê ma bîyayîşê ma yo'

 

Hemsereka Qezaya Ûskudarî ya Partîya Demokratîke ya Şaran (HDP) Aysel Ozbey, wina vat: “Demo ke ez tute bîya, wexto ke eştêne serê dewe, dayîka mi kasetê bi kurdî nimitêne. Tu wext kultur û hunerê ma nîno qedexekerdiş. Ê çi bikerê zî ma do ziwanê xo xo vîr ra nêkerê. Ziwanê ma bîyayîşê ma yo." Aysele dewam de wina vat: "Keye de tutanê xo dir bi kurdî qisey bikerê. Bi kurdî binişnê ro û wurzê û cuya xo bi kurdî dewam bikerê. Heto bîn ra nê tedayî tu wext nêeşkenê ma peyser bierzê."

 

‘Kurdî ke çayê dinya de bê do bi ziwanê xo dayîke qisey bikerê!'

 

Dengbêj Xalide wina qal kerd: “Ciwanê Kurdî yê Taksîmî bi Kurdî deyîran vanê, rastê hêrişê dewlete ameyî. Nê hêrişî zî sey her rey bi hêrişê dewlete yê seba bîyayîşê Kurdan ê bi ziwanê xo yeno cewabdayîş." Xalide dewam de wina vat: “Bi seserran o hêrişî serê ziwanê Kurdî yeno kerdiş, ma nê çî se beno wa bibo, qebûl nêkenê. Hemverê nê ma vanê ke kurdî çayê dinya de benê wa bibê do bi ziwanê xo dayîke qisey bikerê."