RIHA - 'Nobeta Edaletî' ya Emîne û Ferît Şenyaşarî roja 333yine de dewam kena. Emîne û Ferît Şenyaşarî serê hesabê xo yê Medyaya Dîjîtale de nê mesajî vila kerdî: "Bêrayê edlîyeyan neynika edaletê Tirkîya ya." 

 

Vernîyê weçînayîşê 24ê Hezîrane ya 2018î ke, qezaya Pirsûsî ya Rihayî de  14ê Hezîrane ya 2018î de merdim û pawitoxê Parlementerê AKPyî Îbrahîm Halîl Yildiz hêrişê ferdanê keyeyê Şenyaşarî kerd û hîrê ferdê keyeyî kiştî. Emîne û lajê xo Ferît Şenyaşarî seba dewa de edalet bêro ca, 9ê Adare ya 2021î ra verê Edlîyeyê Rihayî de Nobeta Edaletî anê ca. Nobeta Edaletî yê Kayeyê Şenyaşarî roja 333yine de verê edlîye de dewam kena. Emîne Şenyaşar coka ke nêweş a  ewro nêameya cayê nobete. Ferît Şenyaşar ame verê edlîyeyî û nobete dewam kerd. 

 

Keyeyê Şenyaşarî serê hesabê xo yê Medyaya Dîjîtale de eleqedarê nobete rê nê mesajî pare kerdî: "Bêrayê edlîyeyan neynikê edaletî yê Tirkîya yê. Cubeyî sembolê wijdanî û  bêhetî yê Edlîyeyê Rihayî de yê, veng ê!  Serrê ke yo, verê berê edlîyeyî de zilm domneno. Ma şewe û rojî ro edalet gêrenê."