Rojda Aydin  

 

ŞIRNEX - Naîme Encu, 27 serrî yo tepişte ya û bi desan rey ameya surgunkerdiş, keyeyê ci rewşa ci ya weşîye ra bi endîşeyîn o û vat: "Semedo ke bêro tedawîkerdiş, ganî serbest bêro veradayîş. Ma tîya veng danê rayaumumî ke wa seba tepişteyê nêweşan bihîsgêr bê."

 

Tecrîdê ke hemverê Rayberê PKKyî Abdullah Ocalan rê ame girankerdiş, tesîrê xo heme zîndanan rê kerd. Zîndanî nika bîyê îşkencexane û heme heqê tepişteyan ameyê binpaykerdiş. Keyeyê tepişteyan Amed û Wan de seba bale biancê  serê rewşa tepişteyê nêweşan û tepişteyê ke înfazê înan ameyê betalkerdiş çalakîya "Nobeta Edaletî" dayî destpêkerdiş. Keyeyî wazenê bi çalakiyanê xo rayaumumî  baldar bikerê. 

 

Naîme Encu ke 45 serrî, lîsteyê nêweşan ê Komeleya Heqê Merdiman (ÎHD) de ca gêna û 27 serrî yo tepişte ya. Naîme, serra 1977ine dewa Roboskî de qezaya Qilebanê Şirnexî de ameya dinya. Hemverê teda û zilmê serra 1989ine de tewrê têkoşînê azadîye bena. Naîme serra 1995ine de Agirî de yena destbendkerdiş û tepiştiş. 

 

Naîme 27 serrî yo tepişte ya 

 

Naîmeya ke 36 serrî yo ceza ci rê ameya dayîş 27 serrî yo tepişte ya. Naîmeya ke sirgunê Sîvas, Mûş, Farqîn, Mêrsîn, Sêrt, Anqara û Erziromî ameya kerdiş, nika zî Zîndanê Girewte yê Cinîyan ê Bunyanê Kayserî de ya. Naîmeya ke demêk derg o tepişte ya, çimêke aye girêkek vejîyayo û çimêke zî  katarak o. Sewbîna nêweşîyê sey  fitiqê mil û paştî, perdeyê goş teqîyaye û diranê ci heme rijyayê. Pêwa hende nêweşîyan nîna tehliyekerdiş û nîna tedawîkerdiş zî.

 

Bi kelepçe tedawî qebûl nêkena

 

Keyeyê Naîmeye bale ant serê rewşa kênaya xo û vat: "Demê tepişteyan benê nêweşxaneyî bi kelepçeyan benê û anê. Naîme seba ke nê çî qebûl nêkena, nêwazena şêro nêweşxane. Qawişa ci de tepişteyê nêweşî zî estê. Sewbîna xeylêk hacetê ke ma şawenê, erey danê înan. Reyna mektubê tepişteyan nêşawenê û mektuban nêdanê tepişteyan."

 

Keyeyê Naîme seba pandemî bi 3 serrî yonêşîyê pêvînayîş û vatî: "Ma rewşa ci ra bi endîşeyîn ê. Ma vengdayîşê serbestveradayîşê tepişteyê nêweşan kenê."