Sema Çaglak

 

MÊRDÎN - Cinîyê koçerî yê dewa Marînê ya qezaya Nisêbînî ya Mêrdînî de çadir dayê ro, dîyar kerdî ke xoza semedê înan pîroz o û her çiqas cuya înan zor û zahmet bo zî nê metodî de cuya xo ra hes kenê.

 

Koçerî tarîxê Kurdan de wayîrê manayêke taybet û bi qîmet a. Koçerî metodêke cuya kan ê kurdan a. Cuya koçeran, goreyê lebate xozayî vuryena. Koçerê ke zimistanî seba şert û mercê xoza şinê deşte, destpêkê wisarî dir pêwa şert û mercê xidar yê xoza reyan bi saetan û reyan zî bi rojan û mengan, zozan bi zozan gêrenê. Cinîyê koçerî yê dewa Marînî yê girêdayê qezaya Nisêbînî ya Mêrdînî de çadirî dayî ro, qalê şert û mercê cuya xo kerdî.

 

‘Xoza semedê ma pîroz a’

Cinîya koçere, Zeynep Gunbak diyar kerd ke ê 3 mengî verê ameyê dewa Marînî û do heta 2 mengî bîn zî tîya bimanê. Zeynepe wina vat: “Cuya koçeran bi sereyê xo zehmet a. Cuya koçerî de pes sey xezîne yo. Ma keyeyê xo pêwa 6 kesî çadire de manenê. 2 kênayê mi  şiwan ê. Ma serê sibayî bi şefaqî dir dest bi roje kenê. Sobe fînenê ta. Dima ra ez û şiwanê xo arayî amade kenê û ma keyeyî dir arayî kenê. Homa çi nesîb bikero. Dima ra şiwanê ma pesî rê wayîr vejênê û çêrnenê. Ez zî pes ancena û bi şît mast û pênîr viraznenê. Ma debara xo bi mast û penêr rotişî kenê.”

 

‘Ziwatî tesîr keno’ 

 

Zeynepe dewam de wina vat: “Ma bi mengan problemê awe ancenê. Seba ziwatî wareyê zergûnayî zêde çin ê. O zî seba wayîrvejîyayîşê pes sebebê probleman o. Dej  kewto berx û bi pêroyî pesê ma. Heta nika nêzdîyê 50 heywanê ma merdê. Ma derman zî xebitna la reyna zî tu fêyde înan rê çinbi. Ma do heta wisarî tîya bimanê û dima ra derbas Wanî bibê.”

 

‘Cuyêka ma ya hempar esta’

 

Cinîya koçer Aynur Ep(33) zî diyar kerd ke koçerî înan rê dapîr û bapîrê înan ra mendo û wina vat: “ Koçerî bi tena sereyê xo nêeşkenê biciwîyê. Coka koçerî her wext pîya yê û pîya ciwîyenê. Cuya înan û şert û mercê înan xeylêk zehmet o. Zehmetîyê tewr pîl ke ma ancenê, barkerdişê çadiran o. Ma tim rayîr de yê, ma  payiz yenê deşte û hamnanî zî zozan bi zozan gêrenê.”

 

Aynure qiseykerdişê xo wina qedêna: “Di tutê min ê qijî estê, seba nê koçerî seba mi hîn zahmet o. Ma do 2 mengê bînî tîya de bimanê û dima ra tîya ra derbasê Sêrtî bibê. Vewra ke emsar vara, tesîrêk pozîtîf serê ma de kerd. Bi 8 serrî yo vewrêka wina ma nêdîbî. Na vewre hem seba ma, hem seba heywanan do baş bibo, vaş zêde bo û hem zî do hetê berardişê ke ma pes bi dest bikerê baş bibo.