RIHA - Hemsereka Pêro yê ÎHDyî Eren Keskîn e şî serdayîşê Emîne û Ferît Şenyaşarî ke têkoşîna xo ya edaletî domnenê atqî û qerenfîlê ke Dadîyanê Şemî ye Emîne Şenyaşare rê şawitê, da ci. 

 

14ê Hezîrane ya 2018î de qezaya Pirsûsî ya Rihayî de merdim û pawitoxê Parlementerê AKPyî Îbrahîm Halîl Yildiz hêrişê keyeyê Şenyaşarî kerdî û hîrê ferdê keyeyî qetil kerdî. Emîne ya ke di lajê aye û mêrdeyê aye ameyî qetilkerdiş û lajê ci yo Ferît Şenyaşar zî hêrişî de birîndar xelesîya, 9ê Adare de dest bi 'Nobeta Edaletî' kerdî. 

 

Hemsereka Pêro yê Komeleya Heqê Merdiman(ÎHD), Eren keskîn şî serdayîşê Emîne û Ferît o ke verê edlîyeyî de nobete gênê. Erene ke serdayîşî de qisa kerd wina vat: "Dejo ke keyeyê Şenyaşarî ancenê sey pêroyîn dejo ke Kurdistan de yeno ciwîyayîşî yo. No dej xeylêk giran o, coka têkoşîna înan zî dewam kena."

 

Xelata Dayîkê Şemeyî

 

Erene dewam de wina vat: “Dayikê Şemeyî zî seba polîtîkayê çinkerdişî destbendkerdişan de xeylêk tutê xo vînî kerdî. Heta roja ewro zî çi heyf hîn aqubetê înan diyar nîyo. Sey waya Emine zî mîyanê feqîrî û dejî de cuya xo dewam kenê. Hem dayika Gulistan Doku û hem zî Emine Şenyaşar pêwa serdî û varanî de waştişê xo qîrenê. Dayikê Şemîye zî dîyar kerdî ke seba serd nêgîrê, şalgerdan munayê."

 

Dimayê qiseykerdişê Erene şalgerdan û karanfîlê Dayikê Şemeyî şawitî da Emîne Şenyaşar.