AMED - Heyetê Dîsîplînî yê Zîndanî ke gardîyanan Leyla Guven tehdît kerd, nêvîna bi mehnaya "Heqaret karmendê dewlete kerdo" 11 rojî cezaya hucreyî dayî.

 

Kênaya Hemsereka Kongreya Komela Demokratîke (KCD)  Sabîha Temîzkan seba ke dayîka xo bivîno 11 çeleyî de şîbî pêvînayîşê dayîka xo. Sabîha rewşa dayîka xo serê medyaya dijîtalî de pare kerd û vatibî ke dayîka ci ameya tehdîtkerdiş.

 

Sabîha qiseykerdişê dayîka xo serê medyaya dijîtalî de pare kerd û vat: "Mi bi dayîka xo Leyla Guven dir pêvînayîş kerd. Dayîka mi vat, demo ke aye berdê aşîye seba destê aye cebê ci de bîyo hetê gardîyanêk ra ameya tehdîtkerdiş. Dayîka mi zî seba nê tehdîdo ke hetê  kamerayan ra zî ameya tehdîtkerdiş vat ke do gerreyê gardîyanan bikero."

 

Seba heqaretê karmendê dewlete ceza

 

Heyetê Dîsîplînî yê Mudurîyetê Zîndanê Xerpêtî ke tehdîdê gardîyanan nêvînaye ameyo bi îdayê "Heqaret karmendê dewlete kerda" 11 rojî cezaya dîsîplînî Leyla Guvene rê dayî.