STENBOL - Cinîyan reaksîyon vera hêrişê hewayî yê TSKyî ke hemverê Mexmur, Şengal û Dêrdikî de kerdî ramojnayî û dîyar kerdî ke heta Raberê PKKyî Abdullah Ocalan azad nêbo, Şarê Kurdî zî azad nêbeno û wina vat: "Eke Rayberî azad bibo do çareserî bibo. Heta pêvînayîşî nêrê kerdiş, çareserî mimkin nîya."

 

Teyareyê şerî yê aîdê Hêzê Çekdarî yê Tirkî (TSK) 1ê Sibate de saetê şanî de bi hawayêke hemdem hewa ra Şengal, Kampa Multecîyan ê Şehîd Rustem Cudî (Mexmur) û bajarê Dêrikî yê Vakur û Rojhelatê Sûrîye bi saetan bombevaran kerd. Netîceyê bombevaranî de Mexmur de 2, Şengal de zî 3 kesî dinyaya xo bedilna. Hetê şarê herême ra ame dîyarkerdiş ke 2017 ra heta nika no hêrişo tewr hîra verê hemverê Şengalî yo û ame dîyarkerdiş ke cayê sivîlî hedef ameyê girewtiş û ame neqlkerdiş ke bombavaran çar saet û nîm dewam kerdo. Santralê Ceryanî yê Girê Kendal ê Dêrikî zî Hêzê Demokratîk ê Sûrîye (QSD) zî 4 şerwanî dinyaya xo bedilnabî, 5 karker zî birîndar bibî.

 

Cinîyan reaksîyon vera hêrişan ramojnayî û dîyar kerdî ke yewin çareserî azadîya Rayberê PKKyî Abdullah Ocalan ke 23 serrî yo binê tecrîdê giranî de yo.

 

‘Ma do hemverê hêrişan de têkoşîn bikerê'

 

Hemsereka HDPyî ya Kuçukçekmeceyî Gulsum Ozturk dîyar kerd ke hêrişê hemverê Mexmur û Şengalî de kaykerdişêk  Tirkîya yo û vat: "Dewleta tirkî ma rehet nêverdana. Dewlete zana Tirkîya nêeşkena çîyêk bikero, verê xo dana Şengal. Ma do seba nê têkoşîn bikerê. Ma nê qebûl nêkenê. Hasekê de bi rojan pêrodayîşî dewam kerdî û têkoşînê hemverê DAIŞî de 121 kesî dinyaya xo bedilnayî. Na hûmarêke kêm nîya. Nê merdimî şehîd kewtî. Gelo çi sûcê înan estbi. Hêrişê keyeyanê înan kenê, înan kenê çadiran. Hewa cewidnaye ya. Ma cinî ganî nê qebûl nêkerê. Heta dilopêke gonîya ma bimano zî ma do qebûl nêkerê."

 

‘Ma wazenê Rayberî mîyanê ma de bo'

 

Gulsume wina veng da cinî û dayîkê aştîye: "Ma do seba Roja Sîya meydanan de bê. Ma do bikewê grev û sîya xo ra dê. Ma do na roje lanet bikerê. Rayberî ardî kerdî hucre. Ganî ma têkoşîn bikerê. Ma azadîya rayberê xo wazenê. Ma tepiştişê hemserekanê xo qebûl nêkenê. Wa înan vera bidê. Şar hetê ekonomî û manewî de zor û zehmetî anceno. Êdî bes o. Ma do Amed, her çar parçeyê Kurdistanî de bê. Wa cinî wurzê serê lingan. 15ê Sibate 8ê Adare, Newroz û 4ê Nîsane vernîya ma de yo. Ma do heta peynî têkoşîn bikerê. Cinî ciwîyayîş azadî."

 

Azadîya fîzîkî ya Abdullah Ocalanî

 

Endama Însiyatîfa Dayîkê Aştîye Emîne Erbek zî wina erjna: “Ez sey dayîkêke aştîye, têduştî û azadî wazena. Êdî bes o. Gelo nê tedayî do heta key dewam bikerê. Her ke cinî û Şarê Kurdî aştî wazenê, ê hêriş kenê. Do nê tedayî heta key dewam bikerê. Ez tedayê serê Şarê  Kurdî şermezar kena. Lanet kena. Êdî bes o. Heta Abdullah Ocalan azad nêbo Şarê Kurdî azad nêbeno. Wa tu kes nêmiro. Ma heme eynî herra ra ameyê. Rayberî azad bibîne do Şarê Kurdî zî azad bibîne. Ez tecrîd reyke bîn zî şermezar kena.”

 

‘Azadî girêdayê azadîya Rayberî ya'

 

Emîne tewr peyîn wina vat: "Tirkîya bi hêrişê hemverê Mexmur, Şengalî de wazeno vernîya Şarê Kurdî bigîro. Çareserî nêwazenê. La do Şarê Kurdî serkewtê bê. Dewlete kewena zorî verê xo dana hêrişan. Wa berê zîndanan abikerê. Eke rayberê ma azad bibo do Şarê Kurdî zî azad bibê. Her roje zîndanan ra cenazeyî vejênê. La kiştox û tîryakîyan vera dayî. Ma tena heqê xo wazenê. Ma çîyêk bîn nêwazenê. Do serkewtiş şarê Kurdî  bo.”

 

‘Ma aştî wazenê' 

 

Şîrîn Zeyrek zî bale ant serê şert û merce yê zehmet û zilmo ke dîyo û vat: "Ma xeylêk zilm dî. Ma cuyêka weş wazenê. Ma nê zulmî heq nêkenê. Ma aştî wazenê. Rojawan de 121 kesî qetil kerdî. Gelo çi nê merdiman ra wazenê. Merdimayî nê heq nêkena. Eke berê Îmraliyî abibê, do çareserî zî bi ca bêro. Tutê 10 serrî yenê kiştiş, dewletê bînî veng nêvejenê. La ganî vengê xo berz bikerê. Ganî hetkarî bêro dayîş. Do wina çareserîyêk bi ca bêro. Sewbîna ganî berê zîndanan zî bêrê akerdiş."