STENBOL- Buroyê Hukukî yê Asrini derheqê rewşa Rayberê PKKyî Abdullah Ocalanî de vengda Raportorê Taybetî yê Îşkenceyî yê Neteweyanê Yewbîyayan ke wa lezabez pêvînayîş bêro kerdene.

 

Rayberê PKKyî Abdullah Ocalan ke bi komployê mîyanneteweyî 15ê Sibata 1999 de ardî Tirkîya û heta nika Zîndanê  Asayîşê Berzî yê Tipê Fyê Îmraliyî de yeno tepiştiş, bi 11 mengî yo xebere ci ra nîna girewtiş. Muracatê keyeyî û avûkatan ke 1999 ra heta 2016ine bi mehnaya "muxalefetê hewayî","keştî xirabe ya", "koster xirabe ya" ame redkerdiş. A tarîxe ra heta 2019 zî muracatî ameyî kerdiş labelê nê zî her wext ameyî redkerdiş. 

 

Muracatê 'çalakîya lezabeze'

 

Seba ke muracatî bêcewab mendî, avûkatî 3yê sibate ra kewtî hewildayîşêk newe. Buroyê Huqûqî yê Asrinî seba Rayberê Şarê Kurdî Abdullah Ocalanî û tepişteyanê bînan ê Zîndanê Îmraliyî Omer Hayrî Konar, Hamîlî Yildirim û Veysî Aktaşî  3ê sibate de vengda Raportorê Taybetî yê Îşkenceyî yê Neteweyanê Yewbîyayan ke wa lezabez pêvînayîş bêro kerdene.

 

Ganî mîyanê 60 rojî de cewab bêro dayîş

 

Yeno pawitiş ke muracatê Buroyê Huqûqê Asrinî Raportorê Taybetî yê Îşkenceyî yê Neteweyê Yewbîyaye bikewo mîyanê tevgerî, cigêrayîş bikero û mektubê muracatê lezgîn Wezaretê Karê Teberî rê bişawo. Demo ke mektub bêro şawitiş, yeno pawitiş ke mîyanê 60 rojî de cewab bêro dayîş. Ganî raportor qerarê wezaretê bi kesê ke muracat kerdî, pare bikero.