STENBOL - Duştê krîzê ekonomî û wextî,  Yewîyîya Seba Demokrasî Beşîktaşê Stenbolî de Platformê Demokrasîye rona.

 

Yewîyîya Seba Demokrasîye (DÎB) duştê kelûpelê lazimîyê rojane ke yeno xebetnayîş verê Peykerê Teyrê qezaya Beşîktaşê Stenbolî de, Platformê Demokrasîye rona. Endamê DÎBî,  cinîyê kedkarê keyeyan û xeylêk welatî beşdarê Platformê Demokrasîye bî û pankartê 'Ma do hemverê nêseyyewbînîye û kedwerîye de bêveng nêmanê!' aliqnayî.

 

Hemvervatoxa DÎBî Ayşegul Devecîoglu dîyar kerd ke, ê do her panşemeyo dîyîn ê aşme de duştê zemkerdişê cereyanî, xazê fezayî û zexîreyî de  Platformê Demokrasîye ronê. Devecîoglu da zanayene ke, êdî merdimî nêeşkenê debara xo bikerê û eke no rewş dewam bikero,  do merdimî nêeşkê nan zî berê keyeyê xo.

 

Welatîyê ke beşdarê Platformî bî qiseyî kerdî û behsê zehmetîyê ke ancenê kerdî. Welatijan dîyar kerd ke, ê êdî nêeşkenê debara xo bikerê û waştî zemo ke ameyo kerdiş cade apey de bêro girewtiş.

 

Dimayê qisakerdişê welatijan Ayşegul Devecîoglu û endamê DÎBî Mert Buyukkarabacak, metno ke muşterekê beyanatî yo wend.