Medya Uren-Şîrîn Çinar

 

ÊLIH - Vervatoxa TJAyî Gulîstan Sonuk derheqê tecrîdê serê rayberê PKKyî Abdullah Ocalan de yeno kerdiş wina vat: "Grava Îmraliyî sey sîstemê îşkenceyî ameya awankerdiş. No zî bi destê heme neteweyê yewbîyaye û Ewropa bi ca yeno. Tecrîd tena serê Birêz Abdullah Ocalanî ney, serê heme şarê kurdî de sey metodêkê îşkence yeno kerdiş."

 

Tecrîdo girankerde yê serê Rayberê PKKyî Abdullah Ocalanî de 23 serrî yo bêmabên dewam keno. Hemverê  Abdullah Ocalanî Îmraliyî de polîtîkayêêk girankerde yê îzolasyonî kewt dewre. Nika tecrîd serê pêro tepişteyê sîyasî de zî yeno kerdiş. Aktivîsta Tevgerê Cinîyan ê Azadan (TJA) ê Êlihî Gulîstan Sonuk derheqê tecrîdî de ajansê ma rê qisey kerd.

 

'Tecrîd dewam keno'

 

Vernîya 23 serran hemverê Rayberê PKKyî Abdullah Ocalanî de komployêk mîyanneteweyî ame kerdiş û teslîmê Tirkîya ame kerdiş. No komplo nêresa amancê xo û pey ê de komplo bi tecrîdê girankerde dewam kerd. Birêz Abdullah Ocalan Girava Îmraliyî de ame îzolekerdiş û tecrîdkerdiş. No tecrîd 23 serrî yo bêmabên dewam keno û her ke şino yeno girankerde. Ma nêeşkenê vajê no bi destê Tirkîya tena yeno kerdiş zî. Tirkîya yew komara ke pêkerdişê mîyanneteweyî de mohrê ci esto. La binpaykerdişê heqan ê Îmraliyî yeno dewamkerdiş. Senîn ke komplo bi hemkarîya nê dewletan de zî ame kerdiş, tecrîd zî bi eynî rengî yeno dewamkerdiş."

 

'Hemverê kurdan de dişmin ê'

 

Gulîstane dîyar kerd ke neteweyê yewbîyaye eşkenê kerdişê Tirkîya rê bibê asteng û wina vat: "Neteweyê yewbîyaye û yewîya Ewropa eşkeno vernîya tecrîdî û binpaykerdişê heqan bigîro. No sûcêke merdimayî yo û lazim o bibê asteng zî. Bêvengîya xo zî pawenê. Wexto ke babete bena Birêz Abdullah Ocalan û şarê kurdî heme neteweyê ke xo ra vanê ma demokrat ê kewenê mîyanê hemkarîya dişminîya hemverê kurdan."

 

'Tecrîd tesîrê xo serê kurdan de keno'

 

Gulîstane dewam de wina vat: "Bi tu hawayî xebere Birêz Abdullah Ocalanî ra nîna girewtiş. Bi rayîrê mektube, telefon, pêvînayîşê keyeyan zî pêvînayîşê avûkatan dir zî no bi ca nêanê. No tecrîd şeklê xo sîstemê Tirkîya de girewto û serê heme tepişteyê sîyasî û şarê kurdî de yeno kerdiş. Ma zî mîyanê nê tecrîdê girankerde de yê. Heme cuya ma binê muşahadeyî de ya.  Xebatê ma yê sîyasî, komelî, pêvînayîşê ma û cuya ma ya xususî zî binê muşahadeyî de ya. Nê metodî tu qanûn û huqûqan de çin ê. Senîn ke Îmraliyî de şeklê xo girewt, serê heme kurdan de zî yeno kerdiş."

 

'Sebebê alozîyê Tirkîya tecrîd o'

 

Gulîstane wina qal kerd: "Ma prosesê aştîye yê serra 2013 baş zanê. O wext atmosferêke senîn bi, ganî ma baş bierjnê. Tena problemê kurd û tirk ney problemê pêro komelî zî ameyîne safîkerdiş. Dimayê xirabîyayîşê prosesî dir zî Tirkîya her het ra bî cehenem. Bi tecrîdî dir problemê komelî pîl bî. bi destpêkerdişê şerî dir, krîzê ekonomî reyna wina. Ma eşkenê nê krîzê ekonomî, sîyasî û komelî bi tecrîdî dir girê bidê."

 

'Girawa Îmraliyî sey sîstemê îşkenceyî ameye awankerdiş'

 

Gulîstane wina bale ant serê girawe: "Dimayê xirabîyayîşê prosesê aştîye dima zî polîtîkayê xo yê dişminîya n kurdan bi lezî bi ca ardî. Bajarê kurdan, ziwanê kurdî û kulturê kurdî êdî nîno tehemûlkerdiş. Bi polîtîkayê hêrişê taybetî dir hewl danê ke asîmlasyon û qirkerdişê pîl bi ca bîyarê. Fatureyê şerê ke kenê zî şarî ra danê birnayîş. Nê ra tena şarê kurdî ney, şarê Tirkîya zî para xo gêno. Grawa Îmraliyî yê sey sîstemê îşkenceyî ameyo awankerdiş, êdî heme şarê Tirkîya rê zî beno zîndanêko ser akerd."

 

'Xelasî bi rêxistine mimkan a'

 

Gulîstane tewr peyîn wina vat: "Zîndanan, kuçeyan, çar hetê ma bi tecrîd ameyo binê ablûqakerdiş. Xelasîya nê zî bi rêxistine mimkin a. Heqê tepişteyan yeno binpaykerdiş. Rexmê ke cezaya înan qedîyaya zî nînê veradayîş. Zîndanan de êdî midurî nê qerarî danê. Xeylê caardişê kêfî tepişteyan ser o yenê kerdiş. Ma eşkenê tecrîd, binpaykerdişê heqan bi rêxistinbîyayîşê xo birijnê. Hêzêk ma yê wina esto û lazim o şarê Tirkîya zî nê ferq bikero."