ÎZMÎR - Dîdar Gul ke çalakîya derheqê Pêkerdişê Stenbolî de bi 17 kesî dir ameye destbendkerdiş û dewa derheqê înan de ameye akerdiş, dîyar kerdî ke do pawitişê pêkerdiş û meşrûbîyayîşê çalakî dewam bikerê.

 

5ê Tebaxa 2020î de hemverê waştişê wedaritişê Pêkerdişê Stenbolî çalakî ame kerdiş û çalakî de 17 cinî û Îsmaîl Temel ameyî destbendkerdiş û derheqê înan de dewa ameye akerdiş. Yewin roniştişê dewaya 10ê Sibate de 44in Dadgeha Cezaya Asliyeyî ya Bayrakli de ameye vînayîş. Nê kesê ke ameyîne muhakemekerdiş ra yewe zî Dîdar Gul a. Dîdare da zanayîş qerarê ke a roje walîtîyê Îzmîrî girewt kêfî bi û vat, her ke faşîzm mende bibo, do serdestîyê camêrdan zî pîl bibo. Dîdare vat, do pawitişê pêkerdişî û çalakî dewam bikero.

 

‘Ê dîmenî çapemenîya dinya de ca girewtî'

 

Dîdare dîyar kerd ke Komara Kampanya Îzmîrî ya Ma Fek Pêkerdişê Stenbolî ra Vera Nêdanê, hemverê munaqeşeyê peyserantişê pêkerdişî xeylêk bajaran de ameyo awankerdiş û vat: "Heme bajaran, platforman de 5ê Tebaxa 2020î de bi hawayêke hemdem çalakî kerdî. Ma qerar da ma verê OSYMyî de bêrê têhet. A roje polîsan bi hawayêke kêfî mudaxale kerd. Vatî cayê ke ma tede yê cayê rayrayîşî yo. Ma zî vat, ‘ma bi qerar ê, tîya pawenê.' O wext ma bi îşkence ameyî destbendkerdiş. Ê dîmenî heme çapemenîya dinya de ca girewt. Ma di saetan wesayît de ameyî vindarnayîş. Saetanê şanî de înan ma vera da."

 

‘Îdianameyê fezlekeyî polîs o’

 

Dîdare vat, îdianameyê fezlekeyî polîs o û wina vat: “Polîs, dadgehe de bi sifatê muştekî ame goşdarîkerdiş, îdia kerd ke demê destbendkerdişî de birîndar bîyo. Polîsê muştekî nêvat ke şîdet kerdo. Pêwa nê vat, 18 kesî nê ra berpirsîyar ê."

 

‘Wazenê kuçeyan bikerê binê kontrolî’

 

Dîdare vat ke AKP-MHP demêk derg o hewl dano kuçeyan bikero binê kontrolê xo û vat: “Îqtîdar bi no hawa hewl dano ke vernîya hêrso ke pîl beno pado. La pêwa her çî ma peyser nêvindenê. Dewa de hema xeylêk cinîyan îfade nêdayo. Yê ke dayê zî meşrûbîyayîşê çalakî û pêkerdişî pawenê. Ma do hemverê nê zor û tedayî meşrûbîyayîşê çalakî û pêkerdişî bipawê."