AMED - Sekretera Şubeyê Hûmara 2yîn yê Amedî ya DÎSKî Hanîfe Kardaş dîyar kerd ke îqtîdar krîz û feqîrî ra berpirsîyar o û vera ke şerî rê butçe visneno, wa hetkarîya şarî bikero, probleman safî bikero.

 

Goreyê Sazgehê Îstatîstîkê Tirkîya (TUÎK) 2021î de dayeyê betalî se ra 22,1 ame dayîş û hûmara betalî 39 hezar zêde bîyo û sey 3 mîlyon û 777 hezar ameyo qalkerdiş. Dayeyê betaliyê nifûsê ciwanan zî goreyê menga vernîya nê 1.7 puan zêde bîyo û bîyo se ra 22,3.

 

Sekretera Şubeyê Hûmara 2yê Amedî ya DÎSKî Hanîfe Kardaş derheqê babete de erjnayîş kerd.

 

‘Meaşê karkeran keweno cebê patronan’

 

Hanîfeyê vat, seba problemê ekonomî şar se ra 50 betal mendo û wina vat: “Mezunê unîversîta kar nêvînenê. Wendekarî kuçeyan de gêrenê. Nêeşkenê cayêk ke meaşê înan kêmî yo zî bixebityê. Serê Îşkurî de hîn sazgehî xebatkaran gênê. Yê ke serê Îşkurî de xebityenê zî nîmeyê meaşê înan keweno cebê patronan.”

 

‘Şar zano Tirkîya çi rewşe de ya’

 

Hanîfeye wina bale ant serê krîzê ekonomîye û vat: “Yê ke vanê krîz çin o, wa rojêke şêrê market û bazaran û bivînê hela krîz esto yan ney. Bi krîzî dir Tirkîya her ke şina feqîr bîya. Krîzî tesîr serê her wareyê cuye de kerdo. Welat ameyo sewîyeyêka wina ke tutê 13 serrî munaqeşeyê krîzî kenê. Keyeyê betalî tutanê xo kuçeyan de danê xebitnayîş. Tutî destmalan roşenê. Welatî welatê xo de kewtê sewîyeya parsekan. Seba betalî welatî mecbûr manenê ke welat terk bikerê. Seba feqîrî welatî kewenê sewîyeya multecî. Seba vêşanî û feqîrî welatî êdî qîrenê.”

 

‘Ganî fek polîtîkayê şerî ra vera bidê’

 

Hanîfe tewr peyîn wina veng da: “Ganî îqtîdar fek polîtîkayê şerî ra vera bido. Ganî problemî bêrê safîkerdiş. Ganî îmkanê karî bêrê awankerdiş. Belkî no feqîrî werte ra wedarno. No welat bi rastî nê çîyan heq nêkeno. Seba safîkerdişê probleman ganî fek polîtîkayê şerî ra bêro veradayîş.”