ÎZMÎR - Ada Yildiz serê hesabê xo yê medyaya dîjîtale de dîyar kerd ke ameya tacîzkerdiş û derheqê gumanbaran de muracatê sucî kerd û wina vat: "Ez yan zî yewa bîn, ma mecbûr nîyê ke nê biciwîy. Ez wazena cuyêka azad û têduşt de bicîwîyî.”

 

Endama Meclîsê Cinîyan ê Lîseyî Ada Yilmaz Îzmîr de 20ê sibate de Îskeleyê Alsancadî de vapure espar bîne û 5 mêrdan bi vatiş aye tacîz kerd. Ada Yildiz derheqê tacîzî de muracatê sucî kerd. Ada ke şî qerekole û gerre kerd, waşt ke mêrdeyê gumanbarê tacîzî bêrê tespîtkerdiş.

 

Ada, tacîz serê medyaya dîjîtale de da eşnawitiş û vat, demê tacîzî de wezîfedarê asayîşî mudaxale nêkerdê û veng da heme cinîyan ke vera çîyê ke yenê ciwîyayîş, wa bêveng nêmanê û eke vengê xo berz bikerê do komel bivuryo.

 

Ada, dîyar kerd ke bi bîsîklete dersxane ra ameya îskeleyê vapure û demo ke bîsîkleta xo park kerda camêrdê ke aye bi vatişan, tacîz kerda û na rewşe aye xeylêk kerdo endîşe.

 

‘Ganî tacîz nêro nimitiş'

 

Ada dîyar kerd ke xebatkarê asayîşî yê girêdayê şaredarî bêveng mendê û hewl ameyo dayîş ke serê tacîzî padê û wina vat: "Seba ke gumanbarî kewtî verê kamera, bi asanî eşkenê bivînê. Ez nê çî ciwîyaya la wa yê bînî nêciwîyê. Seba tehemulê mi êdî hemverê hêrişê cinîyan de çin o. Ma hema çend rojî verê vat ke çira Sila Şenturk nêameya pawitiş. Reyna qanûnêkê tedbîrî nêame. Tedbîr nêame girewtiş."

 

‘Ganî bêveng memanê'

 

Ada tewr peyîn qiseykerdişê xo de vat, komel reaksîyonêkê bi tesîr vera tacîzî dayo û komel bocezaverdayîş musa yo. Ada wina qal kerd: "Çapemenîya komelî de zî parekerdişê mi do cesaret bido cinîyan. Do cinîyê bînan zî teşwîq bikero. Ez yan zî yewa bîn, ma mecbûr nîyê nê çîyan biciwîyê. No çîyêk bêro qebulkerdiş nîyo. Ez cuyêka azad û têduşt wazena."