STENBOL - Cinîyan dîyar kerd ke qetilkerdişê Nagîhan Akarsele sebebê pîlkerdişê têkoşînî yo û bi sloganê, "Cinî cuye azadî" têkoşînê înan qezenc bikero. Sewbîna cinîyan vat ke yê ke nê prosesî de bêveng manenê, yê ke paşta xo danê têkoşînî, înan ra nêyê.

 

Endama Merkezê Cigêrayîşî yê  Jîneolojî û edîtora kovara Jîneolojîye akademîsyene, nuştoxe, rojnamegere Nagîhan Akarsele Herêma Federal a Kurdistanî de bajarê Silêmanî de 4ê teşrîna verêne de netîceyê hêrişê çekdarî de ameye qetilkerdiş. Nagîhana ke seranserê cuya xo de têkoşînê azadîya cinîyanê kurdan de xebate kerd, qetilkerdişê aye pêro dinya de rastê reaksîyon û protestoyan ame. Cinî wayîrê têkoşînê aye vejîyayî û vatî do têkoşînê cinîyan peynî nêbo.

 

Suîkasta sîyasî

 

Hunermende Pinar Aydinlare da zanayîş ke Nagîhane nas kerda û pîya têkoşîn zî kerdê û vat: "No qetilkerdiş suîkastêkê sîyasî yo. No hêriş hemverê têkoşînê cinîya kurde û zanabîyayîş bi ca ameyo. Senîn ke Sakîne Cansiz, Fîdan, Leyla û cinîyê bînî kurdî ameyî qetilkerdiş, Nagîhane zî bi eynî zîhnîyetî ameye qetilkerdiş. Ganî ma tu wext bêveng nêmanê.  Cinîyan dîyar kerd ke no qirkerdiş munferît nêyo û reaksîyon mojnayîşê qetilkerdişî xeteka muhîm a û ganî tu kes bêveng nêmano. Eksê ci, ganî ma 'cinî cuye azadî' bi vengêko berz vajê.  Ma qirkerdişê hemverê cinîyanê kurdan, têkoşînê şorişî, tevgerê azadîya cinîye ameyo kerdiş. Ma pêro bedenê Nagîhane ya ame qetilkerdişî de bî. Ganî pêro cinîyê kurdî, elewî, êzidî û şar vengê xo berz bikerê. Yê bêveng, yê ke paşta xo danê têkoşînî ma ra nêyê.

 

'Kedêke pîl da têkoşînê cinîyan'

 

Pinare dîyar kerd ke hemverê têkoşînê cinî resayo sewîyeyêka cîya û hemverê nê de xelasîya cinîyan goreyê mi destê cinîyan de yo. Pinare wina vat: “Bi Nagîhane reyde ma şî xeylêk cayan. Ma kesê eynî têkoşînî yê. Jîneolojî wareyêkê hişmendî awan kena ya. Nuqtaya hişmendîya cinî de kedêke pîl ê Nagîhane esto."

 

‘Têkoşîn do bêveng nêmano'

 

Torra Pawitişê Cinîyan ra Ceren Bariş zî reaksîyon vera qetilkerdişê Nagîhane da û vat: “Şexsê Nagîhane de hemverê têkoşînê azadîya cinîyan de hêriş ame kerdiş. No qetilkerdiş, tesaduf nêyo. Nagîhane semedê têkoşînê ke kerda ameye qetilkerdiş. Ma hemverê nê de vengê xo berz kenê. Heme dinya û welatî de cinî hemverê rejîmê tedayî û otorîter vengê xo berz kenê. Cinîyî do hemverê nê hêrişan de bêveng nêmanê. Do no qetilkerdiş, destbendkerdiş, tepiştiş û îşkence vernîya ma nêgîrê. Do sloganê, cinî cuye azadî serbikewo."

 

‘Ganî topyekun veng bêro berzkerdiş'

 

Akademîsyen Neşe Erdîlek zî wina vat: "Ganî pêro cinî reaksîyon vera hedefgirewtişê cinîyê ke têkoşîn kenê bimojnê. Polîsî hemverê cinîyê ke protesto kenê, hêriş keno. Ganî ma reaksîyon vera nê hêrişan zî bidê. Tewr zêde cinîyî bi şîdetî reyde yenê rî bi rî. La ma heta peynî xo ver danê. Ganî ma heme bi hawayêkê topyekun hemverê qetilkerdiş Nagîhane vengê xo berz bikerê. Ganî kes xo nêdo kîşte û nêvajo kes dest nêdano mi. Ganî ma pêro pîya têkoşîn bikerê."