Nazlican Nûjîn Yildiz

 

ÎZMÎR - Cinî derheqê feqîrya cinî û tutan de qisey kerdî û dîyar kerdî ke feqîrîya cinî girêdayeyê şîdetê camêrdî yo. Cinîyan eynî wextî de dîyar kerdî ke  butçe şer û dîyanetî rê yena xerckerdiş, coka feqîrî zî giran bena.

 

Cinîyê Îzmîrî derheqê babete de ajansê ma rê qisey kerdî û dîyar kerdî ke semedê vurnayîşê nê sîstemî, xêrcê rêxistinkerdişêk xurtî rê rayîr çin o.

 

'Feqîrîya cinî û tutan girêdayeyê şîdetê camêrdan o’

 

Gulser Turan dîyar kerd, feqîrîya cinî û tutan girêdayeyê şîdetê camêrdan o û vat: “Îqtîdar tawîz dano şîdetê camêrdî. Wazenê cinîyan hepsê keyeyî bikerê. Betalî sewîyeya tewr corî de ya. Pêro ciwanî nika hewl danê şêrê teberê welatî. Meaşê asgarî qîmê çîyêk nêkeno. Butçe tewr zêde şerî rê yena xerckerdiş. Ganî ma vernîya nînan padê. Nika bi nameyê pawitişî de qanûnan vejenê. Ganî ma şerî ra vajê nê. Ganî ma bêçare şer temaşe nêkerê. Ma bêhêvî nêmanê, hemverê şerî de vejîyê.”

 

‘Do cinî feqîr zî bimano bêpar zî bimano’

 

Cinîya bi nameyê Gulşen Şahîn zî wina vat: “Na rewşe feqîrî ra wetayêr çîyêk bîn nîya. Welatêk de îdarekarî wurzê û vajê, ‘cayê cinî keyeyê aye yo’ do cinî feqîr zî bimano. Ma ameyê nokteyêke wina. Butçe şerî rê xerc kenê. Wa perwerde û weşîye rê xerc bikerê. Wa tutanê kênayan bidê wendiş û feqîrî werte ra wedaryo.”

 

‘Feqîrî tewr zêde ma kişena’

 

Îlknur Maral zî wina vat: “Kapîtalîzm tewr zêde cinîyan kişeno. Nê rewşan de, şeran de tewr zêde cinî û tutî mirenê. Tîya zî wina yo. Mi tutanê xo bi tena sereyê xo pîl kerd. Qezaya Selçukî de 5 tutî şewat de dinyaya xo bedelnayî. La AKPyî dayîka înan sûcdar kerd. Polîtîkaya AKPyî nê ser de aver şinê. Her çî bedenê cinîyan ser yeno kerdiş. Ganî ma pê dir têkoşîn bikerê, sewbîna rayîrêk bîn çin o.”

 

‘Welat de hem cinî hem tutî feqîr ê’

 

Cinîya ke nêwaşt nameyê xo bido wina vat: “Feqîrîya cinîyan hetê îqtîdarî ra bi zanabîyayîş yena kerdiş. Îqtîdar hêzê xurtî yê cinîyan ra terseno. Semedê her çî cinîyan ê qerar danê. Welat de krîzêk giran est o. Cinîyê ke ekonomîya înan çin a, mecbûr manenê bi pereyê mêrdeyê xo debare bikerê. Welat de xora cinî û tutî feqîr ê. Dewlete zî pereyê şarî teberê sînorî de semedê kiştişê merdiman şuxilnena. Ganî no sîstem bivuryo û no hukmat bivuryo.”