ÎZMÎR - Bêrîvan Aydina ke Zîndanê Şakranî de yena tepiştiş, seba paştîdayîşê xoverdayîşê cinîyanê Rojhelatê Kurdistanî xêzan xêz kerd û porê xo zî resîmanê ke xêz kerde de neqş kerd.

 

Badê qetilkerdişê Jîna Mahsa Amînî ke Îran de hetê ‘polîsanê exlaqî’ ra bi îşkence ameye qetilkerdiş, Rojhelatê Kurdistanî de bi serkêşîya cinîyanê kurdan serewedarnayîş ame destpêkerdiş û no serewedarnayîş vilayê pêroyê Îranî bî. Cinîyî çalakîyan pê ardî, qetilkerdişê Jîna şermizarkerdî û seba protestokerdişî xeylê bajar û welatan de cinîyî porê xo tira kerdî. Nê cinîyan ra yew zî Berîvan Aydina ke Zîndanê Şakranî yê Îzmîrî de yena tepiştiş a.

 

Berîvane mektuba ke keyeyê xo rê erşawit de vana ke aye resîmanê xo seba serewedarnayîşî xêz kerda û porê xo zî ci de zêde kerda.