KONYA - Keye û embazê endama Merkezê Cigêrayîşê Jineolojî û edîtora Kovara Jineolojîye Nagîhan Akarsele ke Silêmanî de netîceyê hêrîşa çekdarî de ameye qetilkerdiş keyeyê ke ci de amebî dinya, yad kerdî.

 

Endama Merkezê Cigêrayîşê  Jineolojî û edîtora Kovara Jinelolojîye Nagîhan Akarsele bajarê başûrê Kurdistanî de Silêmanî de 4ê teşrîna verêne de netîceyê hêrişê çekdarî de ameye qetilkerdiş. Cenazeya Nagîhane hetê cinîyan ra bi sloganê, "Cinî cuye azadî" Silêmanî ra ver bi hewlêrî rê ameye raykerdiş.

 

Yeno pawitiş ke cenazeya Nagîhane berê Sazgehê Tipê Edlî (ATK) yê Anqarayî û uca ra berê cayê ke ameya dinya, dewa Golyazî ya qezaya Cîhanbeylî ya Konyayî. Dimayê cenaze berê cayê ke Nagîhane dayîke ra bîya, paweyo ke bi merasîmêkê girseyî yê hetê keye, embaz û heskerdoxê nagîhane ra cenaze bêra definkerdiş.

 

Keye û embazê Nagîhane, keyeyê ke Nagîhane ameya dinya, "Quncikê Nagîhane" amade kerdî. Quncikê ke fotografê Nagîhane ame ronayîş, qerenfîlî ameyî ronayîş û mumî ameyî tafistiş.

 

Keye, keyeyê xo yê Golyazî de dest bi qebûlkerdişê sersaxîyan kerd.