Rojda Aydin 

 

ŞIRNEX - Vîrameyîşê Bedrîye şibîyeno vîrameyîşê bi hezaran kurdistanîyê ke bi teda û zulmê dewlete dir rî bi rî mendê. Bedrîye hemverê qorîcîtî de koçber bî, koçberî de tedayî peynî nêbî. Çend serrî derbaz bibo zî Bedrîye hema zî bi hesretê agêrayîşê serê herra xo ciwîyena û vana: “Ez o rojêke agêrî serê herra xo.”

 

Kurdê ke şahidîyê serranê 80 û 90î kerdî nika şahidîya 2022ine zî kenê û semedê nê şahidan Tirkîya de rengê teda û zulmî qet nêvurya yo û heman zihnîyetê talankerdiş, qirkerdiş, koçberkerdiş, destbendkerdiş, tepiştiş û kiştiş dewam keno. Yew zî nê şahidan ra Bedrîye Înedî ya. Pêwa hende serre zî derbaz bîya, Bedrîye wazena agêra dewa xo.

 

Bedrîye, serra 1967ine de dewa Deşta Lala ya ke qilê Koyê Cûdî de ya, ameye dinya. 18 serrîya xo de yena zewicnayîş. 5 tutê Bedrîye estê. Bedrîya ke xeylêk reyan derheqê proses û averşîyayîşê sîyasî de ajansê ma rê qisey kerd û na rey vîrameyîşê xo yê ewilî qal kerd.

 

Bedrîye, destpêkê qiseykerdişê xo de bale ant serê xususîyê dewa xo û tutîya xo: "Xozaya dewa ma xeylêk weş bî. Dewe de rez, dehlik û heywanê ma estbî. Ma înan dir eleqedar bîne. Dewa ma de bêrivantî hema qijî de destpê kena. Bi zorê keyeyî, ez bi merdimêkê xo dir zewicyaya. Cuye semedê mi bi temamî vurya. Hem cuyêke bîn dir rî bi rî menda û hem zî ma bi rîyê dewlete yê bîne dir rî bi rî mendî.”

 

'Dewe reyke de ameye veşnayîş’

 

Serra 1986ine de qorîcîtî înan rê yena ferzkerdiş û Bedrîye wina bale ancena serê destpêkê tedayan: "Rojêke leşkeran eşt serê dewa ma û vatî, şima do bibê qorîcî. La ma nê çî qebûl nêkerd. Semedê nê serra 1986ine de ma dewa xo terikna. Dimayê ke ma dewe ra vejîyayî, dewa ke her tewir weşbî, xirab û wêran bî. Xora keyeyê ma ameyî veşnayîş. Dimayê ke ma dewe ra vejîyayî, êdî ma anêgêrayî. Bi xususî dewlete serê keyeyê mi de vindertêne û nêverdayîne ke ma şêrê dewa xo. Ma heywananê xo bi erjanî rot û ma dewe ra vejîyayî. Xora serra 1995ine de dewe reyke bîn zî ameye veşnayîş û çîyêk nêverdayî.”

 

Koçberîya serê herra xo

 

Bedrîye ya ke tewrê keyeyê xo verê xo dayî taxa Cûdî ya Cizîrî û tîya de bi ca bîyî qiseykerdişê xo wina dewam kerde: “Ma taxa Cûdî de banêko kîra kerd. Badê çend serra êa taxa Dagkapi de xo rê keye viraşt û ma tîya de bi ca bîyî. La zilmê dewlete tîya de zî dewam kerd. Xeylê reyan polîsan eşt keyeyê ma ser. Seba ke çend merdime ma tewrê PKKyî bîbî kerdêne bahane û sereştişê keyeyî de zilm b ima kerdêne. Wexto ke merdim serê herra xo de koçber bibo xeylê zehmet o.”

 

'12 serrî ceza aye rê birîyaye’

 

Bedrîye dewamê qiseykerdişê xo de bale ante qedexeyê tebervejîyayîşî yê Cizîrî ser û vat: “Serra 2015 û 2016î de qedexe ame îlankerdiş. Badê îlankerdişê qexedeyî xeylê kesî ameyî tepiştiş û înan ra yew zî lajê mi Celal Înedî bî. Celalo 25 serre serra 2017î de leşkerîye de bî û polîsan eşt keyeyê ma ser de. Sereştişê keyeyî de polîsan ci persa û vatî ke derheqê ci de dewa ameya akerdiş. Bado ke leşkerîya lajê mi qedîyeno seba ke bêro keye şino teyaregehê Stenbolî û ewja de yeno destbendkerdiş. Badê 3 roja vera dîyeno. Dima ra zî seba ci 12 serre ceza yena birnayîş û 5 serrî yo ke lajê mi Celal tepişte yo.”

 

‘Lajê mi şîdetê gardîyanan reyde rî bi rî maneno’

 

Bedrîye daye zanayene ke lajê aye nika zîndanê de bine zilmî de yo û wina vat: “Nika lajê mi zîndanê de yeno tepiştiş û zilmêko gird serê ci û tepişteyanê bînan de esto. Her roje şîdetê gardîyanan reyde rî bir î manenê. Lajê mi vano ke werdê zîndanê baş nîyî û wexto ke ê werdî wenê nêweş kewenî. La reyna zî înan nêbenê nêweşxane. Ma ma û ne zî domanê ma nê zilmî ra xelas nêbîyî.”

 

‘Zilmê serranê 80 û 90n ewro dewam keno’

 

Bedrîye dîyar kerde ke zilmê dewlete yê serranê 80 û 90an sey tarzê verene dewam keno û qiseykerdişê xo wina qedênaye: “Zilm qet nêwedîyayo. Tena renge xo bedelnayo. Kurdan ra çina wazenê. Çira destur nêdanî ke ma kurd herra xo ser de bi ziwanê xo û kamîya xo bicuyî. Ma wazenê herra ma êdî serdest biba û ma biagêrî herra xo ser de bicuyî. Ma wazenê êdî çareserî bêra dîyîş. Wa herra ma û domanê ma serdest bibî. tena xeyalê mi oyo ke ez rojêk agêra herra xo.”