MERKEZÊ XEBERAN - Rojhelatê Kurdistanî û Îranî de semedê grevê seranserê welatî de vengdayîş ame kerdiş.

 

Rojhelatê Kurdistanî û Îranî de, protestoyê ke bi rayberîya cinîyan yenê kerdiş, semedê grevê seranserê welatî vengdayîş ame kerdiş.

 

Protestoyê ke dimayê qetilkerdişê Jîna Emînî ya hetê ‘polîsê exlaqî’ ra dest pê kerdî, bi rayberîya cinî û bi sloganê "Jin, Jiyan, Azadî" temamê Rojhelatê Kurdistanî û Îranî de dewam kenê.

 

Serewedaritişê ke bi rayberîya cinî kûçe û meydanan de dewam keno, bi grevê neweyî dir tewr xurt beno. Na çarçewa de Sine û Zahîdanî de karkerê beşê neftî semedê paştdayîşî veng dayî ke seranserê welatî de grev bêro kerdiş.

 

Protestoyî bi xususî kuçeyê geş ê. Vizêr zî Sine, Kirmaşan, Ûrmiye, Mihabad, Bane, Merîwan, Saqiz û cayê bînî yê Rojhelatê Kurdistanî de dewam kerdî. 

 

Sineyê de ciwanî vejîyayî raşteyan. Hêzê dewlete hêrişê civanan kerdî û ê zî bi kerra raybazanê cîyayayê xopawitiş pê ardî.

 

Heto bîn de Bane de zî çalakîyî estbî. Goreyê malumatanê ke ameyî seba ke xoverdayîşê şarî yê ewja nêro dîyîş xetê înternet û sewbînan lazimîyî ameyî birnayîş.

 

Seba paştîdayîşê çalakîyan Sine de hêzê Îranî seba çalakîyan bifetesnî bi çekan hêrişêş pê ardî û xeylê kesî bîyî qurnanî. Ciwanê Tehranî de veng dayî karkeranê sektorê neftî û welatîyê Sîstan û Belûçî ke ewro saet 12.00î de heta sibayê roja Pancşeme vejîyê raşteya û dest bi çalakîyanê pêroyî yê welatî bikerî.

 

Heto bîn de bajarê Tehran, Qûm, Tebrîz, Şîraz, Fûladşehir, Yezdanşehir, Esfehan, Yezid, Meşhed û çend bajaranê bînan de bi reng û raybazanê cayî çalakîyî do bêrî viraştiş û nêrazîbîyayîşê xo yê vera rejîmê îslamî yê Komara Îranî bêro mojnayîş.

 

Mihabadî de zî bi siloganê ‘Cinî, Cuye, Azadîye’ nepoxî serê asmenê bajarî de ameyî firnayîş.

 

Roja destpêkerdişê çalakîyan ra heta nika goreyê malumatanê fermîyan 201 kesî bîyî qurbanî û bi hezaran kesî zî ameyî destbendkerdiş û îşkence bi înan ame kerdiş.