ÎZMÎR – Huqûqnasê ke derheqê roniştişê dewaya Denîz Poyraza ke ameye taloqkerdiş, eşkerayîye dayî û vatî: “Ma na dosya taqîb bikerê. Ma zanê ke kiştoxê rastî do bêrê muhakemekerdiş. Ma zî sey serekê baroyan do taqîbkerdoxê dewa bê.”

 

Roniştişê 5ine dewaya ke Onûr Gencer qetilkerdişê Denîz Poyraze ra yeno muhakemekerdiş, 6ine Dadgeha Cezaya Giran ya Îzmîrî ameye kerdiş. Îdarekar û parlamenterê HDPyî û serekê baroyî dimayê vurnayîşê dosyaya dewa ya semedê Alîgayî verê edlîye de eşkerayîye da.

 

'Sey baro ma dimayê serebûtî yê’

 

Serekê Baroyê Îzmîrî Ozkan Yucel dîyar kerd ke wazenê roniştiş welatijan  û avûkatan ra biremnê û wina vat: “Demo ke cendirmeyan sîle dayî beşdaran ro, heyetêk ke hemverê nê de bêveng mendebî estbî. Ma semedê  Denîz Poyraz edalet wazenê. Ma wazenê qatilê asaye ney, yê ke çeke dayê ci û kesê ke ey teşwîq kerdê û perwerde kerde, vejê werte û bivînê. No hêriş hemverê azadîya rêxistine, hemverê cuya pîya bî. Fikrîyenê ke do ma werte ra wedarnê. Ma do tim edalet biwazê. Sey baro ma pey serebûtî de yê."

 

'Ma do semedê Denîz Poyraze cigêrayîşê edaletî dewam bikerê’

 

Serekê Baroyê Şirnexî Rojhat Dîlsiz zî wina vat: "Mi heta ewro bi desan roniştişê bi nê rengî taqîb kerd. Labelê tîya seke yeno kerdiş, ma dir muamele nêame kerdiş. Rewşa winasî yê komelî de, prosesê  cipersayîşî vînî kenê û muhakemeyêko baş nêno kerdiş. EWro avûkatî yenê astengkerdiş, ma nê muameleyî qebûl nêkenê. Ma do semedê Denîz Poyraze cigêrayîşê edaletî dewam bikerê. Ma do na dosya taqîb bikerê. Ma zanê ke do kiştoxê rastî bêrê muhakemekerdiş. Ma do sey  serekê baroyan taqîbkerdoxê dewa bê."

 

Serekê Baroyê Mûşî Kadîr Karaçelîk zî hişyarî da ke dewa tarîtî de nêmano û ganî destê kamî ra çi ame, nêverdo serê dewa bêro padayîş.

 

Vervatoxa Komîsyonê Huqûq û Heqê Merdiman ê HDPyî Nûray Ozdogan zî dîyar kerd ke zaf eşkera dosya înan ra ameya remnayîş û ê do destûr nêdê dosya înan ra bêro nimitiş.