WAN - Cinîyê ke reaksîyon vera polîtîkayê tecrîdî yê hemverê Rayberê PKKyî Abdullah Ocalanî mojnayî û vatî: "Bi têkoşînê cinîyan ma do zorê polîtîkaya tecrîdî berê."

 

Şarê kurdî û dostê kurdan hemverê tecrîdî yê serê Rayberê PKKyî Abdullah Ocalanî û komployê mîyanneteweyî vejîyabî meydanan û hemverê nê de reaksîyon mojnabî. Cinî hemverê tecrîdî, merdişê bi gumanî yê zîndanan, binpaykerdişê heqan ê zîndanan bi hêrs ê. Cinîyî derheqê tecrîdî û binpaykerdişê heqan ê zîndanan fikrê xo vatî.

 

'Birêz Abdullah Ocalan heqê xo ra bêpar yeno verdayîş'

 

Endama Meclîsê Dayîkê Aştîye Zekîye Kaya da zanayîş ke tecrîdê serê Rayberê PKKyî Abdullah Ocalanî heme zîndanan de vila bîyo û vat: "Bi binpaykerdişê heqan dest danê serê hacetî yê tepişteyan. Tepişteyî bi xeylêk astengîyan dir rî bi rî manenê. Pêwa ke heqê pêvînayîşî yê keye û avûkatan esto labelê Birêz Abdullah Ocalanî nê ra bêpar verdayî."

 

'Ma do rayîrê xo ra şaş nêbê' 

 

Zekîye dîyar kerd ke rayîrê aştî û azadîye rayîrê azadîya Rayberê PKKyî Abdullah Ocalanî de yo û vat: "Ma nêwazenê bi zêdebîyayîşê binpaykerdişê heqan ê binê şertê tecrîdî de cenazeyê tepişteyan zîndanan ra vejîyê. Semedê merdişî peynî bibê, ganî pêvînayîş bi Birêz Abdullah Ocalanî dir bêro kerdiş. Ma zanê ke rayîrê çareserî û aştîye Birêz Abdullah Ocalanî ra derbaz beno. Coka ma do wareyan de bîyarê ziwan ke semedê çareserî bi ca bêro, ganî tecrîd peynî bibo. Ma do rayîrê xo şaş nêbê."

 

'Tecrîd tu exlaq û qanûnan de çin o'

 

Endama Meclîsê Şaredarîye ya Partîya Demokratîke ya Şaran (HDP) Songul Işik da zanayîş ke tecrîd tu exlaq û qanûnan de çin o û vat: "Polîtîkaya tecrîdî şaş a. Tecrîd tena zere de ney, teber de her ware de vila bîyo. Tesîrêkê tecrîdî yê pîl serê ekolojî, ekonomî û cuya merdiman de esto. Cuye dayo vindarnayîş."

 

'Ma bi hêzê cinîye zorê polîtîkaya tecrîdî benê'

 

Îdarekara HDPyî ya Rayîrê Armûşî Macide Varhane wina vat: "Îqtidar ma ra terseno. Ma ra cinîyanê kurdan ra terseno. Coka hem wazenê hem cinîyan, hem tepişteyan, hem zî Rayberê PKKyî Abdullah Ocalanî bêveng bikerê. Ma do bi hêzê cinîye zorê nê zîhnîyet û polîtîkayê tecrîdî berê. Nêeşkenê bi caardişê tecrîdî yê bi nê rengî ma bitersnê."