ANQARA - Zîndanê Evîne yê Îranî ke tepişteyê sîyasî û rojnamegerî manenê, şewatê vizêrê şan de vejîya de 8 kesî birîndar bî.

 

Vizêr şan de Zîndanê Evîne yê  paytextê Îranê Tahranî de şewat vejîya. Rojnamegerê Îranî ke serê hesabê xo yê medyaya dijîtalî de pare kerdî, dîyar kerdî ke şewat zî girêdayeyê çalakîyanê şermezarkerdişî yê rojhelatê Kurdistanî û Îranî yeno kerdiş û îdda kerdî ke rejîm semedê tepişteyê sîyasî "xelas bibo" zîndan dayê verê adirî.

 

Yew selahîyetdarê dewlete ke kanalê dewlete yê Îranî de qisey kerd û vat, adir û rewşa zîndanî binê kontrolî de ya, la fotograf û dîmenê vîdyoyî ke hesabê dîjîtalî de hetê  şarî ra ameyê parekerdiş, mojnenê ke şewat dewam keno.

 

Hîn vîdyoyê ke ameyê parekerdiş de vengê çeke û teqîyayîşan yeno eşnawitiş, hetêk ra zî kesê ver bi zîndanî de rayîr ra şinê, vengê sloganê "Bimiro dîktator" yeno eşnawitiş.

 

Pêwa ke hema zelal nêbîyo, têkilîyê şewatê zîndanî bi çalakîya dimayê qetilkerdişê Jîna Mahsa Amînî esto yan çin o, rojnameger û aktîvîstanê Îranî îddia kerdî ke "adir semedê paştdayîş bidê protestoyan o yan zî hukmatî zîndan veşna yo ke tepişteyê sîyasîyan ra xelas bibo."

 

Kesê ke çalakîyan de ameyî tepiştiş Zîndanê Evîne de yê

 

La sloganê ke şar hemverê rejîmê zordarî verê zîndanî de qîr kenê, na raştî nîşan da ke beno ke ê bi çalakîya Jîna dir têkildar bê, eynî wextî de pêro çalakîkerî ke çar hewteyê peyîn de protestoyan de amebî tepiştiş, Êvîne de ameyîne tepiştiş. Zîndan, îdiayê ke komployê rejîmî esto, tewr xurt keno.

 

8 kesî birîndar bî

 

Medyaya dewlete îdda kerd ke tu têkilîyê şewatî bi çalakîya semedê Jîna yena kerdiş, çin o. Ajansê Xeberan ê IRNAyî binê kontrolê dewlete de yo vat, 8 kesî birîndar bîyê.

 

Walîyê Tehranî zî eşkerayîyêke da û vat, beşêkê zîndanî ke sûcdarê qijî ci de yê, alozî vejîyayo û rewşe bi temamî binê kontrolê înan de ya.