RIHA - Emîne Şenyaşare semedê dosyaya nêweşxaneyî ke 4 serrî ra dima ameye amadekerdiş, da zanayîş ke "waştişê înan bi hawayêkê qismî ame pêşwazîkerdiş” û vat, "Lajê mi Fadil Şenyaşar heta nêro keye, ez o nobete peynî nêkerî. Eke lajê mi bêro keye, ma do zî şêrê keye.”

 

Merdim û pawitoxê parlamenterê AKPyî Îbrahîm Halîl Yildizî 14ê hezîrana serra 2018ine de qezaya Pirsûsî yê Rihayî de hêrişê dikanê keyeyê Şenyaşarî kerd. Netîceyê hêrişî de mêrde û di lajê dayîka Emîne Şenyaşare ameyî qetilkerdiş.  Emîne Şenyaşare û lajê xo Ferît Şenyaşar semedo ke kiştoxî bêrê tepiştiş û muhakemekerdiş 9ê adara serra 2021ine de vernîya Edliyeyê Rihayî de dest bi Nobeta Edaletî kerdî. Çalakîya keyeyî roja 588ine dewam kerd. Keye saetê serê sibayî de ame vernîya Edliyeyê Rihayî û pankartê “Edalet semedê Keyeyê Şenyaşarî” dayê serê blokê betonî. Destê Emîne û Ferît Şenyaşarî de kaxidê bi nameyê “Edalet” estbi. Keye, semedê welatij û avûkatan rayîrê înan kewto edlîye, qalê têkoşînê xo yê edaletî û qirkerdişî kerdî.

 

Pêwa ke qirkerdiş eynî roje de keyeyî rê ameyo kerdiş zî dosyaya dewa seke yê “kargeh” û “nêweşxaneyî” ra yewbînan ra ameyî cîyakerdiş. Dosyaya kargehî de Fadil Şenyaşarî rê 37 serrî û 9 aşmî, Enver Yildizî rê zî 18 serrî cezaya hepsî ameye dayîş. Wexto ke qerarê 3ine Dadgeha Cezaya  Giran ya Meletî ke 2yê nîsana 2021ine de dabî îstînafî, cipersayîşê derheqê qirkerdişê “nêweşxaneyî” de 4 serrî û 4 aşman ame wedaritiş û îdianame ame amadekerdiş. Dosyaya nêweşxaneyî de bi sebebê qetilkerdişê Haci Esvet Şenyaşar û Adil Şenyaşar û birîndarkerdişê Ferît û Mehmet Şenyaşarî, semedê 19 kesan waştişê tepiştişî ame kerdiş.

 

‘Eke lajê mi bêro keye, ma do zî şêrê keye’ 

 

Emîne Şenyaşar ke pêwa pêro astengîyan zî Nobeta Edaletî ya vernîya edliyeyî de dewam kena, derheqê îdianame û nobete qisey kerd. Yew waştişê Nobeta Edaletî zî akerdişê dosyaya “Nêweşxaneyî” bî û derheqê babete de dayîka Emîne wina vat: “Qismêk nê waştişê m abi ca ame. Waştişê ma yo bîn zî oyo ke lajê mi Fadil bêro veradayîş ke zêdeyê 4 serrî yo Zîndanê Xarpêtî de hucreyê yewkesî de yeno tepiştiş. Ez edalet wazena. Lajê mi 4 serrî yo hucreyê yewkesî de yeno tepiştiş. Wa lajê mi vera bide. Di lajê mi pêwa pîyê xo qetil kerdî. Waştî pêro lajê mi qetil bikerê. Heta ke lajê mi nêro keye, ez o fek nobete ra vera nêdî. Eke lajê mi bêro keye, ma do zî şêrê keyeyê xo.”

 

‘Tutê mi nêheqî û bêhuqûqî ameyî qetilkerdiş’

 

Emîne reaksîyon mojna ke Îbrahîm Halîl Yildizo AKPyij îdianameyê dosya de “nêweşxaneyî” de ca nêgîno û wina vat: “Hem hêrişê hemverê kargehî û hem zî yê nêweşxaneyî de Yildiz estbi. Hîn kesan vat ke wexto ke tutê mi ameyîne kişitş, Yildizî çepikan dayîne piro. Vanê ke qeydê kamerayan ameyê diznayîş la ez bawer nêkana. Wa ê qeydan vejê. Eke sucê tutanê mi esto, wa înan zî vejê. Tutê mi bi nêheqî û bêhuqûqî ameyî qetilkerdiş. Zulmo ke ma rê ameyo kerdiş, tu kesî rê nêameyo kerdiş. Heta ke lajê mi nêro veradayîş, ez fek nobeta edaletî ra vera nêdana. Eke bimirî zî wa mergê mi tîya de bo.”