STENBOL - Sîyasetmedaran reaksîyon vera  destbendkerdişê 11 xebatkarê çapemenîya azade dayî û wina vatî: "Rojnamegeran hemverê îşkenceyî sere nêtewênayî, no helwestê serewedaritişê hempar o. Nê teda û zordestî do peynîya înan bîyara. Ma pêro çapamenîya azade yê! Ma do tim kîşte çapemenîya azade de bê.”

 

Çarçewaya cipersayîşê Serdozgerîya Komare ya Anqarayî de 9 bajaran de eştî serê keyeyê rojnamegeran û muxabîra ma Habîbe Eren, Oznur Deger, Mudura Karê Nuşteyî yê Ajansê Mezopotamyayî (MA) Dîren Yurtsever, muxabîra MAyî Bêrîvan Altan, Deniz Nazlim, Selman Guzelyuz, Zemo Aggoz, Hakan Yalçin, Emrullah Acar, Ceylan Şahinli û rojnameger Mehmet Gunhan 25ê teşrîna verêne de ameyî destbendkerdiş. Muxabîra JINNEWSî Derya Ren zî çarçewaya cipersayîşêkê bîn de bi sebebê cezaya aye qetî bîya, ameye tepiştiş.

 

Bi rojnamegeran sere nêdayî tewênayîşî

 

Demê destbendkerdişî de her çiqas polîsan waşt ke sereyê rojnamegeran bidê tewênayîş zî rojnamegeran xo ver da û sere nêtewênayî. Çarçewaya cipersayîşî de hetê dozgerî ra qedexeyê pêvînayîşî yê avûkatan ê 24 saetan ame dayîş. Dimayê peynîbîyayîşê qedexeyî, avûkatî rojêke dima emnîyetê Anqarayî de bi rojnamegeran dir pêvînayîş kerdî. Bi destê kelepçekerde antişê fotografî yê verê alaya tirkî de  rojnamegeran rê ame ferzkerdiş. Reaksîyonê hemverê destbendkerdişê rojnamegeran û îşkenceyê înan ame kerdiş, dewam kenê.

 

Sîyasetmedarî bi rojnamegeran reyde kewtî mîyanê paştdayîşî û dayî zanayîş ke do rojnamegerî fek nuştişê heqîqetî ra vera nêdê û vatî, ê do sere nêtewênê.

 

Yeno waştiş ke heqîqet bêro nimitiş

 

Verfeka Demkî ya Partîya Azadîya Komelî (TOP) Juliana Gozene da zanayîş ke operasyonê vera rojnamegeran netîceyê şerê îqtîdarî yê vera şarê kurdî yo û wina vat: “Yeno waştiş ke derbe bi çapemenîya kurdî bidê û heqîqetî binimnê. Nê çîyî gamê bedelnayîşê şerî yê weçînayîşî yê. Beno ke hîna sûre bibo. Sey sûcî zî ‘Teşwîqkerdişê dişmenîye û kînî yê komelî’ yeno mojnayîş. No zî Qanûnê Sansûrî ke meclîsî ra derbaz bî îşaret keno. Netîceyê nuştişê raştîyan de komelî rê sûc yeno kerdiş. No operasyon sey haletê dûrîkerdişê şarê kurdî û yê bînan o. Eynî wextî de bin ê operasyonî tehdîdê ‘Eke şima qisey bikerê, do peynîya şima sey çapemenîya kurdî biba’ yeno dayîş. Ganî ma hemverê nê hêrişan de vinderê. Rojnamegerî hemverê îşkenceyî de sere nêronayî, no vindertişê xoverdayîşê hempare yo. No teda û zordarî do peynîya înan bîyaro. Ma pêro çapemenîya azade yê. Ma do dewam bikerê û peynîya çapemenîya azade ra şêrê.”

 

'Wa nêvajî qey do bieşkî çapemenîye bêveng bikerê’

 

Hetgira Serekîya Pêroyî ya Partîya Kede (EMEP) Selma Gurkane da zanayîş ke wa nêvajî qey do bieşkê çapemenîye bêveng bikerê û wina vat: “Heme muxalîfî para xo polîtîkayanê zextî yê îqtîdaro sîyasî ra gênê. La sîyasetmedar û rojnamegerê kurdî hîna zêde caardişê taybetinan reyde rî bi rî manenê. Operasyon, destbendkerdiş, tepiştişî pêro nizdîbîyayîşê hemverê problemê kurdî yê îqtîdarî nişan danê. Îqtîdar bi qanûnê sansûrî, bi teda, tepiştiş û destbendkerdişan vano qey do xebatkarê çapemenîye bêveng bikero.”

 

‘Ê do bi zordestî peynîya xo bîyarê’

 

Hemsereka Partîya Awankerdişê Newe ra ya Sosyalîst (SYKP) ya Stenbolî Gurşenay Dalverene dîyar kerd ke ê do bi zordestî peynîya xo bîyarê û vat: “Îqtîdar her ke keweno tenganî, her prosesê weçînayîşî de hetê muxalîf, sosyalist û hêzê demokrasiye keno hedef û hêrişê çapemenîye keno. Îqtîdar seba ke payan ser de bimano, bi dezanformasyon û Qanûnê Sansûrî wazeno sucê ke kerdo binimno. Ê do bi zordestî peynîya xo bîyarê.”

 

‘Ê do nêeşkê sereyê ma çewt bikerê’

 

Sereka Pêroyî ya Partîya Şorişger Elif Torun Onerene zî qiseykerdişê xo de vat: “Hema Qanûnê Sansûrî nêkewtî dewre ‘faşîzm’ yeno weçînayîş. Rojnamegerî nuştişê heqîqetî vera ameyî destbendkerdiş. Ganî rojnamegerî lezubez bêrî veradayîş. Ê do nêeşkê sereyê ma çewt bikerê.”