Dîlan Babat

 

ANQARA - Avûkate Nuray Ozdogane bale ante binpaykerdişê heqê rojnamegeran yê sereştişê keyeyî ra heta prosesê tepiştişê înan ser û dîyar kerd ke rojnamegerî bi hawayêko teberêqanûnî yenê tepiştiş. Nuraye vat: “Wexto ke ma şîyî verê mehkema, qerarê tepiştişê înan ameybî dayîş. Prosesê tepiştişî dûrê raştîya malumatan û zêdekerdişê zûran de pê ame.”

 

Çarçewa tehqîqatêkê Serdozgerîya Komare ya Anqara de 25ê teşrîna verêne de Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Denîz Nazlim, Selman Guzelyuz, Zemo Aggoz, Berîvan Altan, Hakan Yalçin, Emrullah Acar, Ceylan Şahînlî, muxabîrê Jinnewsî Habîbe Eren û Oznur Gunhan û stajyerê MA Mehmet Gunhan bi îşkenceyî ameybî destbendkerdene. Zemo Aggoz îfade ra dima vera dîyabi. 10 rojnamegerî 4 rojan ra dima seba îfadeyê sewqê Edlîyeya Anqara bîyî. Xeber û karê înan ê rojnamegerîye, vilakerdişê înan ê medyaya dîjîtale sey unsurê sûcdarîye pêşkêşê rojnamegeran ameyî kerdene. Îfadeyan ra dima vizêr şan Dîren Yurtsever, Bêrîvan Altan, Denîz Nazlim, Selman Guzelyuz, Hakan Yalçin, Ceylan Şahînlî, Emrullah Acar, Habîbe Eren û Oznur Deger bi îdîaya ‘endamîya rêxistine’ ameyî tepiştene. Stajyer Mehmet Gunhan bi şertê kontrolê edlîyî vera dîya.

 

Sereştişê keyeyan, destbendkerdişê 4 rojan ê mudirîya polîsan û caardişê hemverê rojnamgeran ke het berdişê edlîyeyî raştê îşkence, gef û heqaretî ameyî, ne hetê dozgerîye û ne zî hetê mehkema ra nêameyî dîyîş.

 

Avûkate Nuray Ozdogane prosesê tepiştişê 9 rojnamegeran ercnaye.

 

'Belgeyê cigêrayîşî nêameyî dayiş’ 

 

Nuraye da zanayene ke tehqîqatê derheqê tepiştişê 9 rojnamegeran, tehqîqato ke serra 2022î de ameyo destpêkerdiş o. Nuraye dîyar kerde ke heme rojnamegerê ke xeberan viraştî, herinda ke seba îfadedayîşî bêrî vengdayîş, sereştişê keyeyan de ameyî tepiştiş û wina vat: “Cigêrayîşê ajansêko xeberan bê sebeb nîno qebulkerdiş. Mi qerarê cigêrayîşî dî, la seba ke derheqê dosya de qerarê nimitişî esto, ma nêeşkayî kopîyêka qerarî yê belgeyi bigêrî. Ganî pêro belgeyî, bi taybetî qerarê mehkema, goreyê Qanûnê Têkoşînî yê Hemverê Terorî (TMK) bidîyayêne ma. La nêdîya û binpaykerdişî tîya de destpêkerdî. Ê cigêrayîşê bêdestur pê ardî. Cigêrayîşê dezgehêka xeberan îstîsna û binpaykerdişê heqan o. Çîyo ke cigêrayîş de kerdî, desteserkerdişê kompîturan bî. Wexto ke kompîtur û haletê xeberan yê ajasêka xeberan bêrî desteserkerdiş, ganî tespîtê sûcî zî bêrî kerdiş. Ma îtîrazanê xo kerd la îtîrazê ma nêkerdî zabitname.”

 

'Karê cigêrayîşî nimite ame kerdene’

 

Nuraye dîyar kerde ke cigêrayîşê ajansî de polîsan dest rona kitab û kovaran ser û vat: “Polîsî nê weşanan sey delîlê sûcî girewtî. Ferq nêkeno ke fikrê înan yê şexsî yo yan yê huqûqî yo. Cigêrayîşê ke hetê fikre şexsî yê huqûqî ra ameyî kerdiş de desteserkerdiş qanûnî nîyo. Kitabê ke ci ra heskerdêne verdayî, la kitabe ke ci ra hes nêkenî sey delîlê sûcî dekerdî çenteyan. Pêro haletê ajansî yê seba viraştişê xeberan î. Ganî rojnamegeran rê ‘Ez meraq kena acaba ez eşkena tîya de delîlêk sûcî bivîna’ nêro perskerdiş. Huqûq bi hawayêko dişmenîye ameye weçînitene. Ma hema rapor nêdîyo. Hem çend ke avaûkatî hadre bibî zî ganî şima raporo ke ameyo hadrekerdiş biwanî. Pêro xebatî bi hawaayêo nimite ameyî kerdiş.

 

‘Îşkenceyo ke polîsan kerd verê kamerayan de ameyî kerdiş’

 

Nuraye qiseykerdişê xo de bale ant îşkenceyê polîsan yê sereştişê keyeyan ser û wina dewam kerd: “Pêro muwekîlê ma eynî çîyî vatî. Îşkenceyo giran ameyo kerdiş. Goreyê Qanûnê Cezaye ya Tirkî zî û goreyê qanûnanê mîyanneteweyîyan zî. Pêro zî vatî ke înan derb kerdî, eştî erd ser, malzemeyê înan eştî aye het û na het. Muwekîlê ma yê ke bajaranê bînan ra ameyî dîyar kerdî ke rayîr de gef bi înan ameyo wendiş. Şert û mercê zîndanî yê înfazî nika binê muameleyêko xirab de yî. Hemverê rojnamegera cinî ya ke embaza xo rê huyena de hêrişêko akerde ameyo kerdiş. Îşkenceyo ke bi muwekîlê ma ame kerdiş kamerayan ver de virazîya. No operasyon de, îşkence û muameleyo xirab mojneno ke dîşmenîyêko senî ameyo kerdiş.”

 

'Belgeyê tepiştişî nêdayî avukatan’

 

Nuraye qala wextê ardişê rojnamegeran yê edlîyeyî kerd û vat: “Ma derheqê cigêrayîşî de tu belgeyêk nêvînenê. Belgeyê cigêrayîşî nêdayî ma. Ma hewl da bi persanê ke muwekîlanê ma rê ameyî perskerdiş fehm bikerî. Sereştişê keyeyê înan de çi delîl estbî ke qerarê tepiştişêko winasî dîyayo. Çîyo ke ma fehm kerd no yo; rojnamegerî raşte raşt resnenî. Persê derheqê xeberan perskerdiş qedexe yo, na babete de qerarê DMMEû Mehkemaya Destûrê Bingeyîn esto. Hema hema pêro endamanê çapemenîye rê nê persî ‘Şima MA de xebetîyenî, qey şima endamê komeleya rojnamegeran î?’ ameyî perskerdiş. Wextê sewqkerdişê tepişteyan de ne dozgerî û ne zî dozger belgeyanê tepiştişî nêdayî ma

 

Bi talimat ame weşanayîş’

 

Nûraye da zanayîş ke dosyaya derheqê rojnamegeran de ameya amadekerdiş, dosyayê ke edliyeyî de ameyî amadekerdiş nêyê û wina vat: “Bi xeberanê nêrast û bi zûran prosese tepiştişî dest pêkerd. Waştêne pêrûne bitepişênê. Xora mensûbê çapemenîye yê ameyî tepiştiş, nê ajansan de bi hawayêko çalak şuxilyayîne. Her serdem de ma bi huqûq yenê rî bi rî. Teda, muameleyê nêbaş, îşkence bi kam ci sebebî ameyê kerdiş, ma tu mana nêdaci. Nê operasyonan semedê tersnayîşî yê.  Wazenê rayaumumî ra vajê, 'biewnê ma rojnamegeran nêgînê, ma sûcê talûke kenê gênê’. Coka ma vanê na kûrguya emniyet û wezaretê karê zereyî ya. Bi talimat ame weşanayîş. Muwekîlê ma bale antî serê binpaykerdişê heqan. Hîn dîmenan çapemenîye rê servîs kerdî. No prosesêko bêhuqîqî yo û goreyê sîstemê faşîzane yo. Helwestê asayîşê Tirkîya nîşan dano ke ma zî asayîş de nêyê. No tena hêrişêkê hemverê JINNEWS û Mayî yo. No hemverê pêro çapemenîye yo.”

 

'Na rastîyêka Tirkîyaye ya’

 

Nûraye vat ke no operasyonêkê weçînayîşî yo û vat: “Ewro senîn xebatkarê JINNEWS û MAyî yenê tepiştiş, do hemverê çapemenîya bîne zî wina bêro kerdiş. Na rastîyêka Tirkîyaye ya. Persê polîsan ganî bi agahiya dozgerî bi ca bêro. Înan persê xo dewam kerdî, demo ke ame sewîyeya cipersayîşî ma vat, şima nêeşkenê babetêka verê muhakemeyê ci bîya, şima reyna bikerê babeta hukmî. Persêko reyke ame perskerdiş, ganî êdî nêro perskerdiş. Encax dimayê nê cipersayîşî vaka bibo, eşkeno bêro perskerdiş. La xebera ke ameya viraştiş  û xebata ajansî bena babeta cipersayîşî.”

 

'Rojnamegerî bi hawayêkê bêqanûnî ameyî tepiştiş’

 

Nûraye vat ke kitabê ke keyeyê rojnamegeran de vejîyayê ganî nêbîne babeta cipersayîşî û wina vat: “Welatijî eşkenê tewr zêde kitaban verê xo de bigîrê. Eşkenê kitabê qedexekerde zî verê xo de bigîrê. Şima nêeşkenê nuştoxan ra cigêrayoxan ra persê 'çira şima kitabê qedexekerde verê xo de gênê’ bikerê. No nêbeno babeta sûcdarî. Operasyono ke MAyî rê ame kerdiş, startê tewr pîl yê weçînayîşî yo. Ma do muracatê sûcî bikerê. Demo ke rojnamegeran vatî îşkence bi ma ameyo kerdiş, dadgerî tu kar derheqê nê de nêkerd. Muameleyo nêbaş û îşkence bibo iddia, hukmo ke  bêveng maneno zî sucdar o. Şima nêeşkenê şêrê bi xo gerre bikerê. Demo ke gerre bibo, ganî şima derheqê nê de kar bidê destpêkerdiş.”