Sema Çaglak 

 

ŞIRNEX - Dayîkê Aştîye yê Şirnexî şuxilnayîşê çekanê kîmyewîyan şermizar kerd û dîyar kerdî ke merdime wayîrê wijdanî ganî zilm nêkerî û ganî herkes hemverê şuxilnayîşê çekanê kîmyewîyan de bivejîyo raşteyan.

 

Artêşa Tirke 17ê Nîsane de bi hemkarîya PDKyî hemverê herêmanê Zap, Avaşîn û Metînayî de hêriş da destpêkerdiş. Hêrişê ke bi çekanê kîmyewîyan yê qedexeyan virazîyayî hema zî dewam kenê. Tewr peynî netîceyê hêrişê kîmyewîye de 17 gerîlayê HPG û YJA STARî dinyaya xo bedelnayî. Goreyê xebera Ajansê Xeberan yê Firatî (ANF) mîyanê  6 aşmanê peyênan de tewr tay 2 hezar û 456 reyan gulevarnayîş ameyo kerdiş û çeke kîmyewî yê qedexeyê ameyî şixulnayîş. Reaksîyonê hemverê şuxilnayîşê çekanê kîmyewîyan her ke şino gird beno.

 

Dayîkê Meclîsê Aştîye yê Şirnexî hemverê şuxilnayîşê çekanê kîmyewîyan de reaksîyon mojnayî.

Endamê HPGyî ke herêma Zapî de pê çekanê kîmyewîyan dinyaya xo bedelnabî ra yew zî Xemgîn Cizîr (Yahya Şen) bî. Ema Yahya Şen, Zeynep Şene dîyar kerde ke aye şuxilnayîşê çekê kîmyewîyî şermizar kena û wina vat: “Hêrişê çeke kîmyewî zilmêko gird o. Domanê ma zilm û tedaya hemverê şarê xo vera tewrê têkoşînî bîyê. Xemgînî zî emrê xo yê şenikîye de zilmê hemverê şarî qebul nêkerd û şi. Xemgîn, şehîdê Kurdistanî yo û ma bi têkoşînê ci sere berzê. Şixulnayîşê çeke kîmyewî sûcê şerî yo. La hemverê no sûcî de bêvengî est a. Ez veng dana ke wa tu kes hemverê zilmî de bêveng nêmano.”

 

‘Şuxilnayîşê çeke kîmyewî sûcê merdimîye yo’

 

Endama Meclîsa Dayîkên Aştîye Nurîye Atmişe zî ard ziwan ke merdimê bi wayîrê wijdan zilmî qebul nêkeno û vat: “6 aşmîyo ke şerêko şîdetin est o û nê şerî de çekê kîmyewîyî yenê şuxilnayîş. Pêroyê dinya dî ke tutê ma bi çekanê kîmyewîyan yenê qetilkerdiş. Şuxilnayîşê çeke kîyewîyî sûcê merdimîye yo. Ez veng dana heme welatan, dezge û rêxistinanê mîyanneteweyîyan ke wa çekanê kîmyewîyan ser de cigêrayîş bikerî û nêverdî ke nê çeke bêrê şuxilnayîş. Merdimê wayîrê wijdan û exlaq, ganî no zilmî qebul nêkero û hemverê çekanê kîmyewîyan de veng bivejno û wirzo payan ser.

 

‘Wa Barzanî tarîxê xo ra şerm bikero’

 

Nurîyeye dewamê qiseykerdişê xo de da zanayîş ke sûcê tewr gird PDK û Barzanî kenê û wina domnaye: “Eke Barzanî nêverdayêne ke erdê başûrî de çekê kîmyewî bêrî şuxilnayîş do Dewleta Tirke xo de cesaret nêdîyayên ke hemverê kurdan de nê çekanê kîmyewîyan bişuxilna. Nimuneya tewr gird zî qetlîyamê Seddamî yo ke hemverê kurdan de kerdbî. Wa Barzanî tarîxê xo ra şerm bikero ke ewro destur dano Dewleta Tirke ke erde ci de çekê kîmyewîyan bişixulna. Barzanî ewro binê tesîrê Dewleta Tirke de yo û bi no hawa kurdan bi kurdan dani kiştiş. Eke Baranî dest nêronayêne maskeyê gazî ser do domanê ma netîceyê şixulnayîşê çekê kîmyewîyan de cuya xo vînî nêkerdêne.”

 

‘Barzanî kurdan ra çi wazeno’

 

Nurîyeye qiseykerdişê xo yê peyênan de bale ant tîfaqê kurdan ser û vat: “Heta ke kurdî tîfaqê xo awan nêkerî xelisnayîşê înan nê şerî ra çinî yo. Heta ke ma tîfaqê xo awan nêkerî, ma ser nêkewenî. Heta ke Barzanî gamêk apey nêerzo do kurdî ser nêkewî. Dişmen xo ra dişmenîya xo keno. La Barzanî kurdan ra çi wazeno nîno fehmkerdiş. Kurdî qey dişmenîya yewbîna kenî. Ez veng dana Nêçîrvan Barzanî yî ke Nêçîrvan Barzanî  wayîrê merdimîyeya xo bivejîyo. 50 serrî yo ke kurdî xover danî. Êdî bes o, wa kurdî xayînîya yewbînan nêkerî. Wa dest bidî destê yewbînan û hemverê nê hêrişan de wa tîfaqê xo bimojnî.”

 

‘Wa Ewropa xo kerr û lal nekero’

 

Terw peynî Endama Dayîkê Aştîye Emîne Oruçe qisey kerd û aye zî wina vat: “Ganî herkes hemverê şixulnayîşê çekanê kîmyewîyan de werizo payan ser. Ez veng dana dewletanê ewropî. Acaba qey şima vengê xo nêvejenî. Qey şima babeta kurdan de xo kenî kerr û la. Ê zî baş zanê ke no sûcê şerî yo. Bi şixulnayîşê çeke kîmyewîyan hewl danî ke fermanê kurdan bîyarî. Ma taybetî Barzanî şermizar kenî. Ganî ma tîfaqê xo awan bikerî. Ma do dewaya xo ser de vinderî. Heta ke ma wayîrê dewaya xo nêvejîyî, ma ser nêkewenî.”