Dîlan Babat

 

ANQARA - Rojnameger Sîbel Yuklere derheqê tepiştişê 9 meslegdaranê xo de qisey kerde û vat: “No hêrişêkê hemverê rûmetê meslegî yo. Ganî ma bikewê tevger û paştdayîşê meslegî nîşan bidê.”

 

Çarçewa tehqîqatêkê Serdozgerîya Komare ya Anqara de 25ê teşrîna verêne de 9 bajaran de 11 rojnamegeri ameyî destbenderdiş. Rojnamegera ma Hebîbe Eren, Oznur Deger, Mudira Karanê Nuşteyî yê Ajansê Mezopotamya (MA) Dîren Yurtsever, muxabîrê MA Bêrîvan Altan, Selman Guzelyuz, Denîz Nazlim, Ceylan Şahînlî, Emrullah Acar, Hakan Yalçin bi îdiaya ‘endamtîya rêxistine’ ameyî tepiştiş û berdî Zîndanê Sîncanî.

 

Heto bîn de çarçeweya tehqîqatî de rojnamegerê MAyî Zemo Aggoz û Mehmet Gunhanî ke demêk ajansê MAyî de stajyerî kerdî bi şertê kontrole edlî û hepse keyeyî ameyî verdayîş.

 

Rojnameger Sîbel Yuklere derheqê babete de qisey kerd û dîyar kerd ke meslegdarê aye ke ameyî tepiştiş vîşêrê faalîyetê rojnamegerî tu çîyêk nêkerdê.

 

‘Heme rojnamegerî xeylê baş bî’

 

Sîbele da zanayîş ke JINHA ya ke bi Qerarnameyê Hukmê Qanûnî (KHK) ameye qefelnayene de xebetîyaya û buroyê Anqara de menda. Sîbele vat ke aye o wext şahidîya rojnamegerîya Denîz Nazlim, Selman Guzelyuz, Dîren Yurtsever kerda û vat: “Denîz, bi serran Anqara de rojnamegerî kerd û rojnamegerêkê xeylê baş bi. Denîzî rojeve baş taqîp kerdêne. Babetanê sîyasî waştêne û wayîrê malumatanê akademîkan bi. Habîbe zî wina bî, Selman zî. Tu xeber deste înan ra nêxelesîyayêne. Dîrene dima ra şî Stenbol. Aye zî rojnamegerêka zaf baş bî. Dima ra DÎHA û JINHA ameyî qefelnayene û bi JINNEWS û MAyî reyde dewam kerdi.”

 

‘Raşteyan kesê ke tewr zêde bawerî pê ardêne ra bî’

 

Sîbele ard ziwan ke raşteyan de embazanê xo reyde xebetîyaya û rojnamegerê ke tewr zêde bawerîya şarî pê înan ameyêne ra bî û paştîdayîşêko zêde mi înanra girewt. Sîbele qiseykerdişê xo wina dewam kerd: “Ma 5ê temmuze de waşt ke seba embazanê xo yê ke 16ê hezîrane de Amed de ameyî tepiştiş, bêrê veradayîş Raşteyê Ulusî de eşkerayî bîdê. A roje ez, Denîz û Yildiz Tar pîya bîyî û polîsan şîdet bi ma kerd. Me muracatê sûcî kerd. Wexto ke ez Anqara de xebetîyayêne, pêro embazê ke ameyî tepiştiş reyde ez xebetîyaya. Ez aye vera serberz a.”

 

‘Wexto ke dîyî nêeşkenê ajans bigêrê, embazanê ma tepiştî’

 

Sîbele bale ant prosesê girewtişê JINHA û DÎHAye ser û vat: “JINHA, DÎHA û Ozgur Gundem bi KHKyan 29 Teşrîna Verêne ameyî girewtiş. Ma eşkerayî da. Eşkerayî Habîbe wende. 6 serrî maben ra derbaz bî. Tay raştî nêbedelîyayî. Aye wext bi KHKyan bahane viraştî û ewro zî bi ‘savciname’ wazenê çapemenîya Kurd bê tesîr vera bidê. Nika nêeşkenê dezgehanê ma bigêrî, coka ra embazanê ma tepişti.”

 

‘Sebebê tepiştişî şermêko gird o’

 

Sîbele qala persê ke rojnamegeran rê ameyî perskerdiş kerd û vat ke persê ‘Qey ti şîyî xebere?’ û ‘Qey destê to de mîkrofonê MAyî esto? persîyayî û wina vat: “Serê nameyê huqûqî no şermêko gird o. 11 rojnamegerî sereştişê keyeyan de ameyî tepiştiş. Lazimîyê înan desteser kerdî. Wextê destbendkerdişî di rojan derg kerdî. Çîyo balkêş zî persê ke ameyî perskerdiş. Seba ke proses biqednê wazenê rojnamegerîye sûc bihesibnê. Ma no çî Amed de dî. Raştî zî şermêko gird o. Badê 16 rojnamegeran waştî de cayê tesî awan bikerê. Bi qanûnê sansurî ke meclîsî ra derbaz bî waştî ke ters virazê.”

 

‘Wayîrê ercanê meslekî vejîyayî’

 

Sîbele peynîya qiseykerdişê xo de da zanayîş ke awankerdişê tersî reyde çapemenîya Kurd hedef girewtî û vat: Hêrişê hemverê çapamenîya Kurd hemverê ercanê meslekî de yenê kerdiş. Nê kesî vîşêrê rojnamegerîye tu çîyêk nêkerdî. Wayîrê ercanê meslekî vejîyayî. Xeberê nê kesan est ê. Her çî raşte de yo. Eke ma ewro nêkewî têgêrayîş mîyan do dora bêro ma rê zî. Sey dîspotîk ameyoxêko wina vernîya ma de yo.”