Marta Somek

 

STENBOL- Endama BMGyî Muruvvet Kuçuke hemverê şuxilnayîşê çekanê kîmyewîyan de vengê rayîr ra şîyayîşê 6ê Teşrîna Peyêne ke do Taksîmî de pê bêro, kerd û vat: “Ma do no rayîr ra şîyayîşê sey resksîyon mojnayîşê hemverê şerê lêşin pê bîyayê. Vengê mi seba heme karker û kedkaranê Tirkîya rê yo. Ma hemverê nê hêrişan de reaksiyon nêmojnî siba do Tirkîya bibedenîya cehennemî.”

 

Tirkîya ke bi hemkarîya PDKyî hemverê Herêma Federal ya Kurdistanî de Herêmanê Pawitişê Medya Zap, Avaşîn û Metîna de çekanê kîmyewîyan şixulnaye û netîceyê hêrişanê kîmyewîyan de xeylê gerîlayî dinyaya xo bedelnayî. Seba reaksîyon mojnayîşê nê çekan do 6ê Teşrîna Peyêne de Sîlopî û Stenbolî de bi sloganê ‘Hemverê çekê kîmyewîye de rayîr ra şîyayîşê merdimîye’ rayîrraşîyayîşêk bêro viraştiş. Rayîr ra şîyayîşê Taksîmî do bi serkêşîya Kongreya Demokratîke ya Şaran (HDK), Partîya Demokratîke ya Şaran (HDP) û Hêzê Têkoşînê Yewbîyaye (BMG) pê bêro.

 

Endama BMGyî û Alinterî Muruvvet Kuçuke rayîr ra şîyayîşî ra ver derheqê çekanê kîmyewîyan û muhîmîya rayîr ra şîyayîşî de qisey kerd.

 

Binpaykerdişê têgêrayîşê azadîya Kurd…

 

Muruvvete da zanayîş ke şuxilnayîşê çekanê kîmyewîyan di het o û wina vat: “Heto yewine no yo ke têgêrayîşê azadîya Kurdî hetê îdeolojî, sîyasî û rêxistinî de binpaykerdiş o. Planê têkberdişî îfadeyo tewr ver bi çim o. Heto diyîn zî derheqê polîtîkaya emperyalîstan ya Rojhelato Mîyanenî yo. Dinya de newe ra denge yeno awankerdiş. No denge de Tirkîya bi pêro îmkananê xo hewl dana ke goreyê xo welat îdare bikera û bi tesdîqkerdişê emperyalîstan wina kena. Astengîya tewt gird ê vernîya ci têgêrayîşê azdîye yo.”

 

‘Çekanê kîmyewîyan şixulnena’

 

Muruvvete sewbîna dîyar kerd ke îqtîdar î ra nata operasyonan pê ano û wina domnaye: “Tewr peynî Tirkîya aşma Nîsane de oeprasyonê ‘Pençe Kilitî’ da destpêkerdiş. Wexto ke dî nêeşkena aver şêra muracatê raybazanê lêşinan kerd. Têkilîya aye bi polîtîkaya zerreyi reyde esta. Coka ra hewl dana ke hîkayeyêka serkewte awan bikera. Teyareyan wedarnena, hewa ra hêriş kena, PDK hemkarî û serkêşî kena û raybazanê tebere merdimîye yê tewr wehşane dekena dewre. Bi israr vanê ke ma çekanê kîmyewîyan nêşixulnaya. La badê operasyonê Garê wezîrîya pawitişê neteweyî îtîraf kerd ke ê şixulnayî. Vatî ke bombeyê ke çiman hî kenî yo, la dima ra dîmenan ra ame fehmkerdiş ke xeylê madeyê kîmyewî ameyî şixulnayîş.”

 

‘Şebnem Korur Fîncanci xeylê ercîyaye ya’

 

Muruvvete derheqê Sereka TTByî Prof. Dr. Şebnem Korur Fîncanciya ke badê hedef mojnayîşî  ameye tepiştene de qisey kerd û wina dewam kerd: “Mamoste Şebnem merdimêka wina siradan nîya. Na babete de pisporîya aye esta û Tirkîya de bi serran o têkoşînê heqê merdimîye dana. Merdimêka xeylê ercîyaye ya. Şebnem Korur Fîncanci bado ke ewnîyye dîmenan vat ‘Maneno tesîrê çekê kîmyewîya’. No mojneno ke rejim serê sûcî ra ameyo awankerdiş. Şebneme merdimê ke komel ser de tesîr virazenî ra yew a. Kişta aye de verê xo dayî rojnamegeran. Wazenê ke her çî sîya bikerî.”

 

‘Ganî bêro teşhîrkerdiş’

 

Muruvvete da zanayene ke ganî muxalefetê komelî hemverê nê caardişan de xurt vindero û seba teşhîrkerdişê sûcê merdimîye her çî bikerî û vat: “Ganî ê bibî wayîrê fikr, bibê rojeva şarê Tirkîya, bibî rojeva şarê dinya û na babete de ganî zext bi dewletanê emperyalîstan bikerî. Ma do 6ê Teşrîna Peyêne de hemverê şixulnayîşê çekanê kîmyewîyan de Stenbol de rayraşîyayîşê Taksîmî pê bîyarî. Ma do rayraşîyayîşî sey resksîyon mojnayîşê hemverê şerê leşin pê bîyayî. Vengê mi seba heme karker û kedkaranê Tirkîya rê yo. Ma hemverê nê hêrişan de reaksiyon nêmojnî siba do Tirkîya bibedenîya cehennemî. Na berpirsîyarîyêka muhîm a. Ganî her kes berpirsîyarîya xo bîyara ca.”

 

‘Ma hêrişan pîya veng bivejnî’

 

Muruvvete qiseykerdişê xo yê peyênan de nê ercnaayîşan kerd: “Azadî cuyêka merdimîye ra derbaz bena. Ganî ma seba ci têkoşîn bikerî. Ez veng dana heme karker û kedkaranê Tirkîya. Ez veng dana heme hetanê serkêşan, heme dezgehanê serkêşan yê sîyasîyan.  Seba vengvetişê hêrişan ganî ma dekewî hewldayîş mîyan. Yan zî do Tirkîya her ke şêra xira biba. Ez heme kesan dawetê rayraşîyayîşê 6ê Teşrîna Peyêne kena.”