Sema Çaglak 

 

ŞIRNEX – Sîyasetmedarê cinî yê Şirnexî veng dayî ke wa herkes tewrê rayîr ra şîyayîşê 6ê Teşrîna Peyêne bibo û vat: “No rayîr ra şîyayîşêko wijdanî yo. Ma hemverê menfîetê îqtîdarî de bêveng nêmanenê.”

 

26ê Teşrîna Verêne de bi tewrbîyayîşê partîyê sîyasî, sazî û rêxistinê sîvîlî, hemverê şixulnayîşê çekanê kîmyewîyan de qezaya Silopî ya Şirnexî de deklerasyonêk ame eşkerakerdiş. Ame vatiş ke do 6ê Teşrîna Peyêne de hemverê şixulnayîşê çekanê kîmyewîyan de bi sloganê ‘Hemverê çekê kîmyewîyan de rayîr ra şîyayîşê merdimîye’ rayraşîyayîşêk bêro viraştiş. Hem bajaranê Kurdistanî ra û hem zî bajaranê bînan ra do tewrbîyayîş pê bêro û derheqê rayîr ra şîyayîşî de vengdayîş ame kerdiş. Cinîyê sîyasetmedar seba rayî ra şîyayîşê Silopî veng dayî û dayî zanayîş ke ganî herkes wayîrê rayraşîyayîşî bivejîyo.

 

‘No rayîr ra şîyayîşê cuye yo’

 

Hemşaredara HDPyî ya Cizîrî ke qeyûm tayînê herinda ci ame kerdiş Berîvan Kutlu dîyar kerd ke no rayî ra şîyayîşê cuye, rayîr ra şîyayîşê merdimîye yo û vat: “No rayraşîyayîş do di hetan ra bêro viraştiş. Yew hetêk do qezaya Silopî ya Şirnexî ra verê bere Xaburî de bêro viraştiş. Heto diyîne zî do Stenbol de bêro viraştiş. Yeno zanayîş ke şixulnayîşê çekanê kîmyewîyan qanûnê exlaqî û qanûnê şerî de ca nêgêno. Şixulnayîşê nê çekan sey sûcê şerî yeno binamekerdiş. Nê çekê qedexekerde ke serê herra welatê ma de yenê şixulnayîş ra hem merdimîye zirar vîneno û hem zî heywan û her tewir gandarî zirar vînenê.”

 

‘Ma do wayîrê rayîr ra şîyayîşî vejîyê’

 

Berîvane dewamê qiseykerdişê xo de bêvengîya hemverê şixulnayîşê çekê kîmyewîyan şermizar kerd û vat: “Hemverê nê çekanê qedexekerdeyan de ganî rayîr ra şîyayîşêk bêro viraştiş û vengêk berz bêro berzkerdiş. Vernîya çimanê ma de pê nê çekanê kîmyewîyan xoza yena qetilkerdiş. Wîjdanê tu kesî nê çîyan qebul nêkeno. No eynî wext de rayraşîyayîşêko wijdanî yo. Ma veng dane herkesî ke wa tewrê rayraşîyayîşî bibê. Seba ke nê çekî êdî serê xozaya dinya de nêrê şuxilnayîş, ma do wayîrê rayî ra şîyayîşê bivejê. Bêrêne ma rayîr ra şîyayîşê xurt bikerê. Ma do hemverê qetilkerdişê xoza û merdimîye de vejîyê raşteyan. Eke nê seserrî de zî hemverê merdimîye de çekê qedexekerde bêrî şuxilnayîş û înan rê destur bêro dayîş, ganî kesê ke bêveng manenî cuya xo ra şerm bikerê.” 

 

‘Hemverê menfîetan de bêveng ê’

 

Hemsereka HDPyî ya qezaya Cizîrî Zîlan Ecevîte zî ard ziwan ke amacê înan oyo ke bêvengîya hemverê şuxilnayîşê çekanê kîmyewîyan de veng vetiş o û wina vat: “Serê medyaya dîjîtale de dîmenê şixulnayîşê çekanê kîmyewîyan ame dîyîş û zerrîya merdimîye dejaye. Demêko dergo ke çekê kîmyewîyî hemverê Şarê Kurdî de yenê şixulnayîş. La heme dinya hemverê şixulnayîşê çekan de bêveng ê. Nê çekî dewletanê mîyanneteweyîyan ra yenê girewtiş. Ma înan şermizar kenê. Hemverê nê cardişan de do di hetan ra rayîr ra şîyayîş bêro viraştiş. Rayîr ra şîyayîş hem hetê Rojawanê Tirkîya û hem zî hetê Kurdistanî de yeno viraştiş. Ez veng dana heme şaran ke wa vera şixulnayîşê çekanê kîmyewîyan de bêveng nêmanê.”

 

‘Ma do êdî zilm qebul nêkerê’

 

Tewr peynî Hemsereka HDPyî ya qezaya Hezexî Evîn Erdene qisey kerd û wina veng da: “Wa her kes werizo payan ser û bêveng nêmano. Zerrîya pêro şarî û taybetî zerrîya dayîka vêşena. Bi serran o ke hemverê Şarê Kurdî de çekê kîmyewî yenê şixulnayîş. Êdî ma na rewşe qebul nêkenê. Ma hemkarîya Barzanî şermizar kenê. Rolê Barzanî nê şerî de zêde yo. Herinda ke kişta şarê xo de bibo hetê dewleta tirke de ca gêno. Ma veng danê pêro şaran ke 6ê aşmî de ver bi rayîr ra şîyayîşê merdimîye yê Silopî verê bere Xabûrî de bibê.”