STENBOL - Şubeyê ÎHDyî yê Stenbolî Serekîya Meclîsî rê mektube şirawitî û waştî ke Peymana Stenbolî newe ra bêro rojeve.

 

Şubeyê Komeleya Heqê Merdiman (ÎHD) ê Stenbolî semedê Peymana Stenbolî newe ra bêro rojeve PTTyî yê Galatasarayî rê Serekîya Meclîsî rê mektubêke şirawitî.

 

Polîsan dîyar kerd ke sebebê 25ê Teşrîna Peyêne Roja Têkoşînê Hemverê Şîdetê Cinîyan Ser, hetê Walîtîya Stenbolî ra qerarê qedexeyî ame dayîş û ê do destûr nêdê girseyê ke eşkerayîye bido. Hemverê qedexeyî de Hemsereka Pêroyî ya ÎHDyî Eren Keskîn û endamê ÎHDyî reaksîyon vera rewşe mojnayî. Polîsan bi qerarêk keyfî, dekewtişê postexaneyî yê rojnamegeran qedexe kerd û bi darê zorî ware ra vetî.

 

Ma astengkerdişan protesto kenê

 

Hemsereka Pêroyî ya ÎHDyî Eren Keskîn dîyar kerd ke no huqûqî nîyo û wina vat: “Hem hemverê huqûqê mîyanên ê Tirkîya û hem zî hemverê peymanê mîyanneteweyî, heqê ma yê eşkerayîye ameyo astengkerdiş. Ma nê astengî protesto kenê."

 

Cinîyan badê mektube şirawitî vila bîyî.