COLEMÊRG - Şîrketê Gazê Xozayî ke vat ‘ma do xete biancî taxe û borîyan biancê’ hemwelatijan xapêna. Hemwelatijî dîyar kerdî ke ê ameyî xapênayîş ke kredî biancî la pere çinî yo ke komir bigêrî.

 

Hemwelatijê ke taxa Halîfe Dervîş ya Colemêrgî de cuyenî hetê Şîrketê Gazê Xozayî yê Akmercan û rîyê xozayî ra yenê mexdurkerdiş. Pêvînayîşê vernan de ame vatiş ke do gazê xozayî biancê la şîrket problemanê bejahî kerd bahane û xet nêanca taxe. La bado ke ame musayîş eynî şîrket seba mudirîya emnîyetî gazê xozayî anto, hemwelatijê taxe reaksîyon mojnayî na rewşe.

 

Cinîyê taxa Halîfe Dervîşî ajansê ma rê mexdurîyetê xo ardî ziwan ser.

 

‘Gaz dîya emnîyet û lojmanan’

 

Şukriye Korkmaza ke taxa de cuyena vat ke selahîyetdarî aşma hezîrane de vatî ke do gazê xozayî biancî û wina dewam kerd: “Ma seba nê çîyî kredî ant. Borîyan antî keyeyan la 6 aşmîyo ke gazê xozayî vera nêdanê. Ez û mêrdeyê xo ma tena yê. Ma bi meaşê asgarî ewnîyenê keyeyê xo. Mabenê ma û emnîyetî de 20 metre esto la gaz dîyayo lojman û emnîyetî. Madem wina bî qey kredî ma ant û ma kewtî binê deynî.”

 

‘Tena seba emnîyetî xebetîyenê’

 

Şukriyeye ard ziwan ke emwelatijê taxe hertim muracat kenê û wina dewam kerd: “Vatî ke qereyollarî destur nêdano. Acaba qey gazê xozayî nêdîyeno ma. Acaba ma merdime siradanan rê coka ra? Zimistan ame. Ma heme pereyê xo seba xetê gaze da. Pere nêmend ke ma komir bigêrî. Ma nika se bikerê?”

 

‘Ma nêeşkenê kredîya xo bidê’

 

Cinîya bi nameyê Menekşe Ertuşe zî reaksiyon mojna û vat: “Bi aşmano ke seba gazê xozayî xebetîyenê. Seba antişê xete ma kredî ant. La şîrket û qereyollarî ma mexdur kerdî. Awanîya ma ya hirî qat esta. Ma kredî ant. La ma reyna zî ma zehmetî ancenê. Krîzê ekonomi raşte de yo. Bi aşman o ma kredî danî. Nika ma nêeşkenî komir bigîrê.”

 

‘Şarî rê xizmet çinî yo’

 

Menekşeye qiseykerdişê xo yê peyênan de vat: “Taxa ma hem nizdîyê merkezî hem zî nizdîyê raşteyê girdi yo. La reyna zî xet gire nêdayî. Ma desan reyan muracat kerd. La cewabêko pozîtîf nêdîya ma. Ma kewtî binê deynan. La gaz nêdîyeno. Emnîyet hetê bîn ê rayîrî de yo. La gazê înan verdayî. La gazê ma hemwelatijan vera nêdayî. Wa sebebê na rewşe vajê. Emnîyet rê xizmet esto la şarî rê çinî yo. Ma nika nêeşkenê komir daxî bigîrê.”