MERKEZÊ XEBERAN - Vizêr rojhelatê Kurdistan û Îranî de semedo ke rejîmî şermizar bikerê, şar bi rayberîya cinî û ciwanan de vejîya meydanan û bi sloganê, "Jin jiyan azadî” ame neqlkerdiş ke do çalakî dewam bikerê.

 

Protestoyî û çalakîyê 17ê êlule ra vera qetilkerdişê cinîya ciwane ya Kurde Jîna Emînî ra ame destpêkerdiş, bi hawayêkê hîra rojhelatê Kurdistanî û Îranî de roja xo ya 52yîne de dewam kenê. Cinîya Kurde ya Merîwanî ra Nesrîn Qadirî ke 4ê Teşrîna Peyêne de tewrê protestoyê roja Îne yê Tehranî bîbî, hetê hêzê rejîmê Îranî ra ameye qetilkerdiş. Nesrîn Qadirî, Tehran de unîversîta wendêne, dimayê vilabîyagîşê qetilkerdişê cinîya Kurde, welatijê Merîwanî dest bi protestoyan kerdî.

 

Pêwa hewldayîş û tedayê selahîyetdaran dewlete yê serê keyeyê Nesrîn Qadirî ke sebebê merdişê kênaya xo bi nêweşîya ci rê girêbidê, hêrsê şarê Merîwanî nêkewt û vizêr serê sibayî protestoyî dest pêkerdî. Binê rayberîya cinî û ciwanan de xeylêk welatijî vejîyayî kuçeyê Merîwanî û tewrê protestoyan û çalakiyan bî. Protestoyî bi averşîyayîşê adir û berzkerdişê sloganê, ‘Jin, Jiyan, Azadî’ û ‘Merdiş semedê dîktator’ nêrazîbîyayîşê xo mojnayî. Hêzê rejîmê Îranî zî bi teda, zordarî û şîdet hewldayî çalakîkeran vila bikerê, la bi ser nêkewtî ke heta ereyê şewa vîyarte protestoyî dewam bî. Goreyê agahîyê şahîdan ra ameyî girewtiş, 10 kesî protestoyan de birîndar bîyê.

 

Sewbîna bajarê Sine, Seqîz, Bokan û Kirmanşan de prostesto û çalakîyê cîya cîya dewam bî. Bokan binê rayberîya cinîyan de rayîr ra şîyayîş û çalakî bi berzkerdişê sloganê, ‘Jin, Jiyan, Azadî’ ameyî kerdiş. Eynî şewa vîyarte de taxê bajarê Sine de ciwanan bi tavistişê adirî û padayîşê rayîrê trafîkî çalakiyê xo dewam bikerê. Temamê Îranî de zî çalakî û protestoyan wendekarê unîversîteyan dewam bî. Bajarê Zahîdan komêke wendekarê cinî bi sloganê ‘Merdiş semedê diktator’ rayîr ra şîyayîş kerdî. Eynî wextî de bajarê Tehranî, Buşehr û xeylêk bajarê bînî yê Îranî protestoyî û çalakî dewam bî.

 

Tehran de zî çalakîkeran bi berzkerdişê sloganê hemverê îqtîdarê paştdayîşê xo çalakîkerê Kurdistan û Belûçistanî rê neql kerdî û sloganê ‘Kurdistan û Belûçistan, roşnîya çimeyê Îran’ berz kerdî.